ఎండీఆర్ వినియోగదారులకు కాదు.. నిర్దిష్ట మర్చంట్ లావాదేవీలకే వర్తింపు

హైదరాబాద్, సెప్టెంబర్ 25 (ప్రతినిధి): యూపీఐ డిజిటల్ చెల్లింపులపై మర్చంట్ డిస్కౌంట్ రేట్ (MDR) చార్జీల విషయంలో సాధారణ వినియోగదారులు ఎలాంటి ఆందోళన చెందాల్సిన అవసరం లేదని కేంద్ర ఆర్థిక మంత్రి నిర్మలా సీతారామన్ స్పష్టం చేశారు. ఎండీఆర్ కారణంగా వినియోగదారులపై అదనపు భారం పడబోదని తెలిపారు.

₹2,000కు మించిన కొన్ని నిర్దిష్ట యూపీఐ మర్చంట్ లావాదేవీలకు ఎండీఆర్ వర్తించినప్పటికీ, ఆ చార్జీని వినియోగదారుల నుంచి వసూలు చేయరని చెప్పారు. ఎండీఆర్ అనేది కేంద్ర ప్రభుత్వం విధించే పన్ను, సెస్ లేదా సర్‌చార్జ్ కాదని, దీని ద్వారా వసూలయ్యే మొత్తం ప్రభుత్వ ఖజానాకు చేరదని స్పష్టం చేశారు.

యూపీఐ చెల్లింపు వ్యవస్థ నిర్వహణ, విస్తరణకు సంబంధించిన సేవలను అందించే బ్యాంకులు, పేమెంట్ యాప్‌లు తదితర వ్యవస్థ భాగస్వాముల మధ్య ఈ రుసుము పంపిణీ అవుతుందని వివరించారు.

ఇప్పటికే డెబిట్, క్రెడిట్ కార్డుల ద్వారా జరిగే చెల్లింపుల్లో ఎండీఆర్ విధానం అమల్లో ఉందని నిర్మలా సీతారామన్ గుర్తుచేశారు. అదే తరహాలో యూపీఐలోనూ ఎండీఆర్‌ను వినియోగదారులపై మోపబోమని పేర్కొన్నారు.

వ్యక్తుల మధ్య జరిగే అన్ని యూపీఐ (P2P) నగదు బదిలీలు మొత్తంతో సంబంధం లేకుండా ఉచితంగానే కొనసాగనున్నాయి. అలాగే ₹2,000 వరకు మర్చంట్ చెల్లింపులు, అర్హత కలిగిన చిన్న వ్యాపారులకు సంబంధించిన లావాదేవీలు కూడా ఎండీఆర్ పరిధికి బయటే ఉంటాయి. కొత్త విధానంతో సుమారు 96 శాతం మర్చంట్ యూపీఐ లావాదేవీలపై ప్రభావం ఉండదని కేంద్ర ప్రభుత్వం తెలిపింది.

యూపీఐ వినియోగదారులకు డిజిటల్ చెల్లింపు సేవలు యథావిధిగా అందుబాటులో ఉంటాయని, ఎండీఆర్‌పై వస్తున్న అపోహలతో ప్రజలు గందరగోళానికి గురికావద్దని కేంద్ర ఆర్థిక మంత్రి సూచించారు.

KAVETI SAMMAIAHAY24-R-0006· 25 Sep 2026 · 06:27