445.78 గ్రాముల కిరీటంపై అనుమానాలు.. బంగారు కిరీటం భద్రంగానే ఉందని బోర్డు వెల్లడి

హైదరాబాద్, సెప్టెంబర్ 25 (ప్రతినిధి): కేరళలోని ప్రసిద్ధ శబరిమల అయ్యప్ప ఆలయంలో 2012లో భక్తులు సమర్పించిన బంగారు కిరీటం కనిపించడం లేదంటూ వెలువడిన కథనాలు చర్చనీయాంశంగా మారాయి. అయితే బంగారు కిరీటం మాయమైందన్న వార్తలను ట్రావెన్‌కోర్ దేవస్వం బోర్డు (టీడీబీ) ఖండించింది. తిరువాభరణం కమిషనర్ అందించిన సమాచారం ప్రకారం అసలు బంగారు కిరీటం భద్రంగానే ఉందని టీడీబీ అధ్యక్షుడు కె. జయకుమార్ వెల్లడించారు.

2012 ఆగస్టులో తమిళనాడుకు చెందిన భక్తులు అయ్యప్ప స్వామికి ఈ కిరీటాన్ని సమర్పించారు. అప్పటి రికార్డుల్లో దాని మొత్తం బరువు 445.78 గ్రాములుగా నమోదైంది. ఇటీవల ఆలయంలోని విలువైన వస్తువుల జాబితా పరిశీలన సందర్భంగా సుమారు 240 గ్రాముల బరువున్న మరో కిరీటం కనిపించడంతో అసలు కిరీటం ఏమైందన్న అనుమానాలు తలెత్తాయి. తొలుత అసలు కిరీటం స్థానంలో నకిలీ కిరీటం ఉందంటూ వార్తలు వెలువడ్డాయి

కేరళ హైకోర్టు నియమించిన అమికస్ క్యూరీ జస్టిస్ కె.టి. శంకరన్ పర్యవేక్షణలో శబరిమల, ఆరన్ములలోని విలువైన వస్తువుల జాబితా పరిశీలన జరుగుతున్న సమయంలో ఈ అంశం వెలుగులోకి వచ్చింది. ఆరన్ముల స్ట్రాంగ్ రూమ్‌లో నాలుగు సావరిన్ల బంగారు గొలుసు కనిపించడం లేదన్న అంశం కూడా పరిశీలనలో వెల్లడైనట్లు కథనాలు పేర్కొన్నాయి.

అయితే తాజా వివరణలో అసలు బంగారు కిరీటం కనిపించకుండా పోలేదని, అది భద్రంగానే ఉందని దేవస్వం బోర్డు స్పష్టం చేసింది. దీంతో తొలుత వచ్చిన ‘కిరీటం మాయం’ కథనాలు, అనంతరం వచ్చిన అధికారిక వివరణ నేపథ్యంలో కిరీటాల బరువు, రికార్డుల్లోని వివరాలకు సంబంధించిన పూర్తి స్పష్టతపై పరిశీలన కొనసాగుతోంది.

KAVETI SAMMAIAHAY24-R-0006· 25 Sep 2026 · 05:55