రూ.3,600 కోట్లతో పీఎం ఆవాస్ యోజన కింద గృహాలు — 177 ఇళ్లతో 3డీ నిర్మాణ పైలట్ ప్రాజెక్టు
బుర్రిపాలెంలో కేంద్ర మంత్రి శివరాజ్ సింగ్ చౌహాన్, సీఎం చంద్రబాబు నాయుడు ప్రారంభం

గుంటూరు, అక్టోబర్ 04, 2026, AYUSH24 NEWS ప్రతినిధి:

ఆంధ్రప్రదేశ్‌లో ప్రధానమంత్రి ఆవాస్ యోజన (గ్రామీణ్ 2.0) కింద రూ.3,600 కోట్లతో 3 లక్షల శాశ్వత గృహాల నిర్మాణ కార్యక్రమాన్ని కేంద్ర వ్యవసాయ, రైతు సంక్షేమ, గ్రామీణాభివృద్ధి శాఖ మంత్రి శివరాజ్ సింగ్ చౌహాన్, ముఖ్యమంత్రి నారా చంద్రబాబు నాయుడు ఆదివారం ప్రారంభించారు.

గుంటూరు జిల్లా తెనాలి మండలం బుర్రిపాలెంలో నిర్వహించిన కార్యక్రమంలో దేశంలోనే తొలి 3డీ నిర్మాణ సాంకేతికతతో చేపట్టనున్న 177 ఇళ్ల పైలట్ ప్రాజెక్టుకు శ్రీకారం చుట్టారు. ఈ పైలట్ ప్రాజెక్టును రూ.14 కోట్ల వ్యయంతో చేపట్టనున్నట్లు పీఐబీ తెలిపింది.

ఈ సందర్భంగా శివరాజ్ సింగ్ చౌహాన్ మాట్లాడుతూ, ఆంధ్రప్రదేశ్‌కు తొలుత 76 వేల ఇళ్ల కోటా ఉన్నప్పటికీ ముఖ్యమంత్రి చంద్రబాబు నాయుడు విజ్ఞప్తి మేరకు మొదటి విడతగా 3 లక్షల శాశ్వత గృహాలను అందిస్తున్నట్లు తెలిపారు. ఈ మూడు లక్షల ఇళ్ల నిర్మాణం పూర్తయిన అనంతరం మరిన్ని ఇళ్ల మంజూరుకు చర్యలు తీసుకుంటామని పేర్కొన్నారు. రాష్ట్రంలోని ప్రతి పేద కుటుంబానికి శాశ్వత గృహం అందించడమే లక్ష్యమని తెలిపారు.

3డీ కాంక్రీట్ ప్రింటింగ్‌తో గృహ నిర్మాణం

బుర్రిపాలెం, ఓబులనాయుడుపాలెంలో చేపడుతున్న 3డీ కాంక్రీట్ ప్రింటింగ్ పైలట్ ప్రాజెక్టుతో నిర్మాణ సమయం, ఖర్చు, శ్రమను తగ్గించే అవకాశం ఉంటుందని కేంద్ర మంత్రి పేర్కొన్నారు. అధునాతన సాంకేతిక పరిజ్ఞానంతో నిర్మించే ఈ గృహాలను ఆరు నెలల్లో పూర్తి చేయాలని లక్ష్యంగా పెట్టుకున్నట్లు తెలిపారు.

రైతులు, మహిళల సాధికారతపై దృష్టి

రైతుల సంక్షేమాన్ని ప్రస్తావించిన శివరాజ్ సింగ్ చౌహాన్, కేంద్ర ప్రభుత్వం పీఎం-కిసాన్ సమ్మాన్ నిధి కింద అందిస్తున్న రూ.6 వేలతో పాటు రాష్ట్ర ప్రభుత్వం ‘అన్నదాత సుఖీభవ’ ద్వారా రూ.14 వేలు అందిస్తూ రైతులకు వార్షికంగా రూ.20 వేల ఆర్థిక సహాయం అందిస్తున్నట్లు పేర్కొన్నారు.

స్వయం సహాయక సంఘాల మహిళల సాధికారతలో భాగంగా రాష్ట్రంలో ఇప్పటికే 23 లక్షల మంది మహిళలు ‘లఖ్‌పతి దీదీలు’గా మారారని, ఈ సంఖ్యను 60 లక్షలకు పెంచడం లక్ష్యమని తెలిపారు.

ఈ నెల 15న ఆంధ్రప్రదేశ్‌లో జాతీయ ‘సరస్ మేళా’ నిర్వహించనున్నట్లు, రాష్ట్రపతి ద్రౌపది ముర్ము దీనిని ప్రారంభించనున్నట్లు కేంద్ర మంత్రి ప్రకటించారు.

“తెలుగు భాష తేనె కన్నా మధురమైనది”

బుర్రిపాలెంలో తన ప్రసంగాన్ని తెలుగులో ప్రారంభించిన శివరాజ్ సింగ్ చౌహాన్, “తెలుగు భాష తేనె కన్నా మధురమైనది” అని పేర్కొన్నారు. ప్రజలకు సేవ చేయడం దేవుడిని పూజించడంతో సమానమని వ్యాఖ్యానించారు. తాను మధ్యప్రదేశ్‌కు ‘మామ’ అయితే ఆంధ్రప్రదేశ్‌కూ ‘మామ’నేనని అన్నారు.

కేంద్ర మంత్రికి చంద్రబాబు కృతజ్ఞతలు

ముఖ్యమంత్రి చంద్రబాబు నాయుడు మాట్లాడుతూ, రాష్ట్రంలోని పేదలకు శాశ్వత గృహాలు కల్పించాలన్న విజ్ఞప్తికి స్పందించి మూడు లక్షల ఇళ్లను మంజూరు చేసినందుకు కేంద్ర మంత్రి శివరాజ్ సింగ్ చౌహాన్‌కు కృతజ్ఞతలు తెలిపారు. రాష్ట్రానికి మొత్తం 9 లక్షల ఇళ్లు అవసరమని కోరినట్లు పేర్కొన్నారు. మొదటి దశ పూర్తయిన తర్వాత మిగిలిన ఇళ్ల మంజూరుకు కేంద్రం సహకరిస్తుందని ఆశాభావం వ్యక్తం చేశారు.

ప్రధానమంత్రి నరేంద్ర మోదీ మార్గదర్శనం, కేంద్ర ప్రభుత్వ సహకారంతో మౌలిక సదుపాయాలు, వ్యవసాయం, ఆధునిక సాంకేతికత, గ్రామీణాభివృద్ధి రంగాల్లో ఆంధ్రప్రదేశ్‌ను ముందుకు తీసుకెళ్తామని చంద్రబాబు నాయుడు పేర్కొన్నారు.

కార్యక్రమంలో కేంద్ర గ్రామీణాభివృద్ధి, సమాచార శాఖ సహాయ మంత్రి డాక్టర్ పెమ్మసాని చంద్రశేఖర్, రాష్ట్ర మంత్రులు నాదెండ్ల మనోహర్, కొలుసు పార్థసారథి, కందుల దుర్గేష్, బీజేపీ రాష్ట్ర అధ్యక్షుడు పీ.ఎన్. మాధవ్, రాజ్యసభ సభ్యుడు లింగమనేని రమేష్, ఎమ్మెల్సీ ప్రసాద్, బాతు తాత్యా బాబు, కేంద్ర, రాష్ట్ర ప్రభుత్వాల అధికారులు, రైతులు, మహిళలు, గ్రామస్తులు పాల్గొన్నారు.