నష్టపరిహారం చెల్లించకుండా నిర్మాణ పనులు చేపడితే అడ్డుకుంటాం: కేవీపీఎస్, ప్రజా సంఘాలు

యాలాల, సెప్టెంబర్ 1, 2026 | అయుష్ 24 న్యూస్: యాలాల మండలం దౌలాపూర్ రెవెన్యూ పరిధిలో ఇంటిగ్రేటెడ్ స్కూల్ నిర్మాణం కోసం తీసుకున్నట్లు చెబుతున్న దళిత, పేద రైతుల భూములకు నష్టపరిహారం చెల్లించాలని కేవీపీఎస్, ప్రజా సంఘాలు డిమాండ్ చేశాయి. నష్టపరిహారం చెల్లించకుండా నిర్మాణ పనులు కొనసాగిస్తే వాటిని అడ్డుకుంటామని వారు హెచ్చరించారు.

ఈ మేరకు కేవీపీఎస్ రాష్ట్ర సహాయ కార్యదర్శి, వికారాబాద్ జిల్లా ప్రధాన కార్యదర్శి ఉప్పలి మల్కయ్య ఒక ప్రకటనలో పేర్కొన్నారు.

ఆయన తెలిపిన వివరాల ప్రకారం.. యాలాల మండలం దౌలాపూర్ రెవెన్యూ గ్రామ పరిధిలోని సర్వే నంబర్ 73లో చెన్నారం, దౌలాపూర్ గ్రామాలకు చెందిన దళిత, వడ్డె కులాలకు చెందిన పేద రైతులకు 1980లో అప్పటి ప్రభుత్వం సాగు చేసుకునేందుకు భూమిని పంపిణీ చేసిందన్నారు. 11 కుటుంబాలకు రెండు ఎకరాల చొప్పున మొత్తం సుమారు 25 ఎకరాల భూమిని కేటాయించినట్లు తెలిపారు.

ఆ భూములను అప్పటి నుంచి రైతులు సాగు చేసుకుంటూ జీవనం కొనసాగిస్తున్నారని పేర్కొన్నారు. అయితే ఇంటిగ్రేటెడ్ స్కూల్ నిర్మాణం పేరుతో రైతులకు సరైన సమాచారం ఇవ్వకుండా వారి పొలాల నుంచి ఎర్రమట్టిని తరలించారని, దీంతో భూములు సాగుకు అనుకూలంగా లేకుండా పోయాయని ఉప్పలి మల్కయ్య ఆరోపించారు.

నష్టపరిహారం చెల్లించాలని డిమాండ్

భూములకు ఎలాంటి నష్టపరిహారం చెల్లించకుండా నిర్మాణ పనులు చేపట్టడం వల్ల పేద రైతులు నష్టపోతున్నారని ఆయన ఆవేదన వ్యక్తం చేశారు. రెవెన్యూ అధికారులు, కాంట్రాక్టర్ల తీరుపై కూడా ఆయన అభ్యంతరం వ్యక్తం చేశారు.

2013 భూసేకరణ చట్టం ప్రకారం భూములు తీసుకున్న సందర్భంలో రైతులకు న్యాయమైన నష్టపరిహారం అందించాలని ఆయన డిమాండ్ చేశారు. భూసేకరణకు సంబంధించిన నిబంధనలను పాటించకుండా వ్యవహరించడం సరికాదన్నారు.

ముఖ్యమంత్రి రేవంత్ రెడ్డి ప్రాతినిధ్యం వహిస్తున్న జిల్లాలోనే పేద, దళిత రైతుల భూముల విషయంలో న్యాయం జరగకపోవడం ఆందోళనకరమని వ్యాఖ్యానించారు.

ఎమ్మెల్యే జోక్యం చేసుకోవాలని విజ్ఞప్తి

స్థానిక ఎమ్మెల్యే వెంటనే ఈ సమస్యపై జోక్యం చేసుకుని, ప్రభుత్వం దృష్టికి తీసుకెళ్లి బాధిత దళిత, పేద రైతులకు న్యాయమైన నష్టపరిహారం అందేలా చర్యలు తీసుకోవాలని ఉప్పలి మల్కయ్య కోరారు.

నష్టపరిహారం, భూ సమస్యను పరిష్కరించకుండా నిర్మాణ పనులు కొనసాగిస్తే కేవీపీఎస్, ప్రజా సంఘాల ఆధ్వర్యంలో ఆందోళన చేపడతామని తెలిపారు.