ఈ నెల 12 నుంచి 18 వరకు రాష్ట్రవ్యాప్తంగా వేడుకలు

బతుకమ్మ సంబరాల్లో మహిళలు పెద్దఎత్తున పాల్గొనాలి: టీఆర్ఎస్ రాష్ట్ర నాయకులు లకుమారపు మల్లయ్య

దేవరకొండ, అక్టోబర్ 12, 2026, AYUSH24 NEWS ప్రతినిధి:

తెలంగాణ సంస్కృతి, సంప్రదాయాలకు ప్రతీకగా నిలిచిన బతుకమ్మ పండుగను రాష్ట్రవ్యాప్తంగా వైభవోపేతంగా నిర్వహించాలని టీఆర్ఎస్ రాష్ట్ర నాయకులు లకుమారపు మల్లయ్య పిలుపునిచ్చారు. ఈ నెల 12 నుంచి 18వ తేదీ వరకు బతుకమ్మ సంబరాలను ఘనంగా నిర్వహించేందుకు టీఆర్ఎస్ పార్టీ రాష్ట్ర అధ్యక్షురాలు కల్వకుంట్ల కవిత పిలుపునిచ్చినట్లు ఆయన తెలిపారు.

ఈ సందర్భంగా లకుమారపు మల్లయ్య మాట్లాడుతూ, తెలంగాణ ఆడపడుచుల ఆత్మీయతకు, ఐక్యతకు, సాంస్కృతిక వైభవానికి బతుకమ్మ పండుగ నిలువెత్తు నిదర్శనమని పేర్కొన్నారు. రాష్ట్రవ్యాప్తంగా నిర్వహించే బతుకమ్మ వేడుకల్లో కల్వకుంట్ల కవిత పాల్గొని మహిళలతో కలిసి బతుకమ్మ ఆడిపాడుతూ తెలంగాణ చారిత్రక సంస్కృతి, సంప్రదాయాలను విశ్వవ్యాప్తం చేసేందుకు కృషి చేస్తారని తెలిపారు.

రాష్ట్ర పార్టీ పిలుపు మేరకు దేవరకొండ నియోజకవర్గంలోని టీఆర్ఎస్ మహిళా విభాగం నాయకులు, కార్యకర్తలు బతుకమ్మ సంబరాల్లో పెద్దఎత్తున పాల్గొనాలని కోరారు. పూలతో అందంగా అలంకరించిన బతుకమ్మలతో మహిళలంతా ఉత్సాహంగా పండుగను జరుపుకోవాలని సూచించారు.

తెలంగాణ ప్రత్యేక సంస్కృతిని భావితరాలకు అందించడంలో బతుకమ్మ పండుగకు విశిష్ట ప్రాధాన్యం ఉందని పేర్కొన్నారు. మహిళలందరూ ఐక్యంగా పాల్గొని బతుకమ్మ సంబరాలను విజయవంతం చేయాలని పిలుపునిచ్చారు.

ఈ సందర్భంగా దేవరకొండ నియోజకవర్గ ప్రజలకు, మహిళలకు లకుమారపు మల్లయ్య బతుకమ్మ పండుగ శుభాకాంక్షలు తెలియజేశారు.

Musini.AnjanAY24-R-0011· 12 Oct 2026 · 15:44