నిర్వహణ కమిటీకి 15 మంది సభ్యుల ఎన్నిక – కీలక పదవులపై ఉత్కంఠ

చైర్మన్, వైస్ చైర్మన్, కోశాధికారి పదవులకు నేడు సాయంత్రం 4 గంటలకు ఎన్నికలు

నల్లగొండ, అక్టోబర్ 12, 2026, AYUSH24 NEWS ప్రతినిధి:

నల్లగొండ జిల్లా ఇండియన్ రెడ్‌క్రాస్ సొసైటీ నిర్వహణ కమిటీ ఎన్నికలు ప్రశాంతంగా ముగిశాయి. మొత్తం 1,385 మంది ఓటర్లు పాల్గొన్న ఈ ఎన్నికల్లో 32 మంది అభ్యర్థులు పోటీ పడగా, వారిలో 15 మంది నిర్వహణ కమిటీ సభ్యులుగా ఎన్నికయ్యారు. ఎన్నికల ఫలితాల ప్రకటన అనంతరం విజేతలకు అధికారులు ఎన్నికల ధ్రువీకరణ పత్రాలను అందజేశారు.

ఎన్నికల అనంతరం నిర్వహించిన విలేకరుల సమావేశంలో అదనపు కలెక్టర్ ప్రేమ్ కుమార్, జిల్లా సహకార అధికారి మమత ఎన్నికల నిర్వహణ, ఓట్ల లెక్కింపు, తదుపరి కార్యాచరణకు సంబంధించిన వివరాలను వెల్లడించారు.

ఓట్ల లెక్కింపు ప్రక్రియ తెల్లవారుజామున 2 గంటల వరకు కొనసాగిన నేపథ్యంలో నిర్వహణ కమిటీలోని కీలక పదవులకు ఎన్నికలను నేడు సాయంత్రం 4 గంటలకు నిర్వహించనున్నట్లు అధికారులు తెలిపారు. ఈ ఎన్నికల్లో చైర్మన్, వైస్ చైర్మన్, కోశాధికారి తదితర పదవులను భర్తీ చేయనున్నట్లు వివరించారు.

నూతన కార్యవర్గ ఎన్నికల ప్రక్రియ పూర్తయిన అనంతరం ఎన్నికైన సభ్యులు, పదవుల వివరాలతో జిల్లా కలెక్టర్ ద్వారా ప్రభుత్వానికి నివేదిక సమర్పించనున్నట్లు అధికారులు పేర్కొన్నారు.

ఎన్నికలు ప్రశాంతంగా, సజావుగా నిర్వహించేందుకు సహకరించిన పోలీసు శాఖ, ఎలక్ట్రానిక్ మీడియా ప్రతినిధులు, సహకార శాఖ సిబ్బంది, నల్లగొండ ప్రజలకు అధికారులు ప్రత్యేక కృతజ్ఞతలు తెలిపారు. ఎన్నికల్లో విజయం సాధించిన అభ్యర్థులందరికీ శుభాకాంక్షలు తెలియజేశారు.

కీలక పదవులపై సర్వత్రా ఆసక్తి

నిర్వహణ కమిటీ సభ్యుల ఎన్నికతో ఇండియన్ రెడ్‌క్రాస్ సొసైటీ ఎన్నికల తొలి ఘట్టం ముగియగా, ఇప్పుడు కీలక పదవుల ఎంపికపై ఆసక్తి నెలకొంది. చైర్మన్, వైస్ చైర్మన్, కోశాధికారి పదవులను ఎవరు దక్కించుకుంటారనే అంశం ఉత్కంఠ రేపుతోంది.

నేడు సాయంత్రం జరగనున్న ఎన్నికలతో నల్లగొండ జిల్లా ఇండియన్ రెడ్‌క్రాస్ సొసైటీ నూతన పాలకవర్గంపై స్పష్టత రానుంది. దీంతో కీలక పదవులు ఎవరిని వరించనున్నాయనే విషయంపై అందరి దృష్టి నిలిచింది.

Musini.AnjanAY24-R-0011· 12 Oct 2026 · 01:39