డిజిటల్ కొనుగోలు విధానం, నాణ్యతా ప్రమాణాలు, ట్రేసబిలిటీపై ప్రత్యేక దృష్టి
అక్టోబర్ 6న హైదరాబాద్‌లో ‘సంస్కరణ్ ఉత్సవ్ 2026’ ప్రత్యేక ప్రదర్శన

హైదరాబాద్, అక్టోబర్ 04, 2026, AYUSH24 NEWS ప్రతినిధి:

పత్తి రైతులకు సాధికారత కల్పించడంతో పాటు పారదర్శకత, సాంకేతిక పరిజ్ఞానం ఆధారంగా భారత పత్తి విలువ శ్రేణిని మరింత బలోపేతం చేయడమే లక్ష్యంగా చేపట్టిన సంస్కరణలను ప్రదర్శించేందుకు కేంద్ర జౌళి మంత్రిత్వ శాఖ పరిధిలోని కాటన్ కార్పొరేషన్ ఆఫ్ ఇండియా (సీసీఐ) అక్టోబర్ 6న హైదరాబాద్‌లో ప్రత్యేక కార్యక్రమాన్ని నిర్వహించనుంది.

**‘సంస్కరణ్ ఉత్సవ్ 2026’**లో భాగంగా నిర్వహించే ఈ కార్యక్రమంలో కేంద్ర, రాష్ట్ర ప్రభుత్వాల ఉన్నతాధికారులు, తెలంగాణ ప్రభుత్వ ప్రతినిధులు, విధాన నిర్ణేతలు, రైతులు, పారిశ్రామిక సంఘాల ప్రతినిధులు, పత్తి, జౌళి రంగాలకు చెందిన భాగస్వాములు పాల్గొననున్నట్లు పీఐబీ వెల్లడించింది.

పత్తి సేకరణ, రైతుల నమోదు, డిజిటల్ స్లాట్ బుకింగ్, నేరుగా ఖాతాల్లోకి చెల్లింపులు, నాణ్యత నిర్ధారణ, ఉత్పత్తుల సమాచార పర్యవేక్షణ, పత్తి విక్రయాలు, భాగస్వాముల అనుసంధానం తదితర అంశాల్లో సీసీఐ చేపట్టిన సాంకేతిక, సంస్థాగత సంస్కరణలను కార్యక్రమంలో ప్రదర్శించనున్నారు.

కపాస్ కిసాన్ డిజిటల్ ప్లాట్‌ఫామ్‌పై ప్రత్యేక ప్రదర్శన

రైతుల నమోదు నుంచి స్లాట్ బుకింగ్, పత్తి సేకరణ సమాచారం, ఆధార్ ఆధారిత చెల్లింపుల వరకు వివిధ దశలను ఒకే డిజిటల్ వేదికపైకి తీసుకొచ్చిన కపాస్ కిసాన్ డిజిటల్ ప్లాట్‌ఫామ్ కార్యక్రమంలో ప్రధాన ఆకర్షణగా నిలవనుంది. పత్తి కొనుగోలు ప్రక్రియలో పారదర్శకతను పెంచడం, సంక్లిష్టతలను తగ్గించడం, రైతులకు స్పష్టమైన సమాచారం అందించడం దీని లక్ష్యమని పేర్కొన్నారు.

భారత పత్తి నాణ్యతను మెరుగుపరచడం, ఉత్పత్తి నుంచి సేకరణ వరకు వివరాలను గుర్తించే ట్రేసబిలిటీని బలోపేతం చేయడం, కలుషితాలను నియంత్రించడం, కస్తూరి కాటన్ భారత్ ద్వారా అత్యుత్తమ నాణ్యత కలిగిన పత్తిని ప్రోత్సహించడం వంటి చర్యలను కూడా ప్రదర్శించనున్నారు.

హై డెన్సిటీ ప్లాంటింగ్ సిస్టమ్ (హెచ్‌డీపీఎస్) ద్వారా పత్తి ఉత్పాదకతను పెంచడం, రైతుల ఆదాయాన్ని మెరుగుపరచడం, భారత పత్తి రంగం పోటీతత్వాన్ని బలోపేతం చేయడంపై ప్రత్యేకంగా దృష్టి సారించనున్నారు.

కార్యక్రమంలో రైతులు, పరిశ్రమ భాగస్వాములు సంస్కరణల అమలుతో తమకు ఎదురైన అనుభవాలు, ప్రయోజనాలను పంచుకోనున్నారు. సీసీఐ చేపట్టిన కీలక సంస్కరణల అమలు, వాటి ప్రభావాన్ని వివరించే లఘు చిత్రాన్ని కూడా ప్రదర్శించనున్నారు.

పట్టు రంగంలోనూ డిజిటల్ సంస్కరణలు

కేంద్ర జౌళి మంత్రిత్వ శాఖ పరిధిలోని కేంద్ర సిల్క్ బోర్డు చేపట్టిన సంస్కరణలను కూడా ‘సంస్కరణ్ ఉత్సవ్ 2026’లో ప్రదర్శించనున్నారు. సిల్క్ మార్క్ సేవల డిజిటలీకరణ ద్వారా ప్రస్తుతం 7,000 మందికి పైగా అధీకృత వినియోగదారులు సేవలు పొందుతున్నారని, ఏటా 500 మందికి పైగా కొత్తగా నమోదు అవుతున్నారని పీఐబీ తెలిపింది.

‘మేరా రేషమ్ మేరా అభిమాన్’ కార్యక్రమం ద్వారా పట్టు పరిశ్రమలో సాంకేతిక పరిజ్ఞానాన్ని క్షేత్రస్థాయికి తీసుకెళ్లే చర్యలు చేపట్టినట్లు పేర్కొంది. మొదటి దశలో 1,400కు పైగా కార్యక్రమాల ద్వారా 75 వేల మంది రైతులకు ప్రయోజనం చేకూరిందని తెలిపింది. రెండో దశలో 218 కీలక పట్టు పరిశ్రమ జిల్లాలను కవర్ చేస్తూ ఇప్పటివరకు 1,700కు పైగా కార్యక్రమాలు నిర్వహించి, 73 వేల మందికి పైగా రైతులను నేరుగా చేరుకున్నట్లు పేర్కొంది.

పట్టు పరిశ్రమ, పర్యాటకం, విద్య, స్థానిక ఆర్థికాభివృద్ధిని అనుసంధానించే ‘సెరి-టూరిజం’ కార్యక్రమాన్ని కూడా కేంద్ర సిల్క్ బోర్డు ముందుకు తీసుకెళ్తోంది.

పంట నుంచి పట్టు దారం వరకు, పట్టు దారం నుంచి కర్మాగారం వరకు, అక్కడి నుంచి ఫ్యాషన్, విదేశీ మార్కెట్ల వరకు బలమైన, సమగ్ర వస్త్ర విలువ వ్యవస్థను నిర్మించాలన్న లక్ష్యంతో ఈ సంస్కరణలు చేపడుతున్నట్లు పీఐబీ పేర్కొంది.