ఇచ్చిన హామీలను నెరవేర్చాకే ఓటు అడుగుతాం: అయిలి ప్రసాద్
సంక్షేమం, అభివృద్ధికి ప్రభుత్వం ప్రాధాన్యం ఇస్తోందని వెల్లడి
మంథని, సెప్టెంబర్ 22 (ప్రతినిధి):
మంథని నియోజకవర్గంలోని కాకర్లపల్లి గ్రామంలో సోమవారం స్మార్ట్ రేషన్ కార్డుల పంపిణీ కార్యక్రమం నిర్వహించారు. మండల కాంగ్రెస్ పార్టీ అధ్యక్షుడు అయిలి ప్రసాద్ ఆధ్వర్యంలో అర్హులైన లబ్ధిదారులకు కార్డులను పంపిణీ చేశారు.
ఈ సందర్భంగా అయిలి ప్రసాద్, మార్కెట్ కమిటీ చైర్మన్ కుడుదల వెంకన్న మాట్లాడుతూ.. ఎన్నికల సమయంలో ప్రజలకు ఇచ్చిన హామీలను ఒక్కొక్కటిగా అమలు చేస్తూ సంక్షేమం, అభివృద్ధికి రాష్ట్ర ప్రభుత్వం ప్రాధాన్యం ఇస్తోందని పేర్కొన్నారు.
మంత్రి దుద్దిళ్ల శ్రీధర్ బాబు చొరవతో మంథని నియోజకవర్గంలో సంక్షేమ, అభివృద్ధి కార్యక్రమాలు కొనసాగుతున్నాయని వారు తెలిపారు. అర్హులైన కుటుంబాలకు ప్రభుత్వ పథకాల ప్రయోజనాలు మరింత సులభంగా అందేలా స్మార్ట్ రేషన్ కార్డుల పంపిణీ చేపట్టినట్లు పేర్కొన్నారు.
మహిళలకు ఉచిత ఆర్టీసీ ప్రయాణం, గృహజ్యోతి పథకం కింద అర్హులకు 200 యూనిట్ల వరకు ఉచిత విద్యుత్, రూ.500కు గ్యాస్ సిలిండర్, రైతు భరోసా, రైతు రుణమాఫీ, సన్నబియ్యం పంపిణీ, ఇందిరమ్మ ఇళ్లు, రేషన్ కార్డుల పంపిణీ వంటి కార్యక్రమాలను ప్రభుత్వం అమలు చేస్తోందని వారు వివరించారు.
“ప్రజలకు ఇచ్చిన హామీలను నెరవేర్చిన తర్వాతే వారి ముందుకు వెళ్లి ఓటు అడుగుతాం. సంక్షేమాన్ని ప్రతి అర్హ కుటుంబానికి చేరువ చేయడం, గ్రామాల అభివృద్ధికి కృషి చేయడమే లక్ష్యం” అని అయిలి ప్రసాద్ పేర్కొన్నారు.
అనంతరం రాష్ట్ర సోషల్ మీడియా కార్యదర్శిగా నియమితులైన ఆరెల్లి కిరణ్ గౌడ్ను శాలువాతో సత్కరించి శుభాకాంక్షలు తెలిపారు.
కార్యక్రమంలో మార్కెట్ కమిటీ డైరెక్టర్ కనబోయిన ఓదెలు, మాజీ సర్పంచ్ ఆకుల శ్రీనివాస్, ఉప సర్పంచ్ ఆకుల ప్రత్యూష సాయి, కాంగ్రెస్ నాయకులు మెండే రాజయ్య, తన్నీరు లక్ష్మణ్, వార్డు సభ్యులు, యువజన నాయకులు, రేషన్ డీలర్ పద్మ, గ్రామ ప్రజలు, పార్టీ నాయకులు, కార్యకర్తలు తదితరులు పాల్గొన్నారు.
Leave a Reply