కేంద్ర ప్రధాన ఎన్నికల కమిషనర్ జ్ఞానేష్ కుమార్ ఏకపక్ష, నియంతృత ధోరణిని తీవ్రంగా ఖండిస్తున్నామని ప్రముఖ నాయకులు మేడ సైదులు ఒక ప్రకటనలో స్పష్టం చేశారు. ఈ దేశంలో ధనిక, పేద, కుల, మత వ్యత్యాసాలు లేకుండా పౌరులందరికీ రాజ్యాంగం సమానంగా కల్పించిన ఏకైక ఏకైక ప్రాథమిక హక్కు ఓటు హక్కు మాత్రమేనని ఆయన గుర్తుచేశారు. అలాంటి పవిత్రమైన హక్కును ఎస్సీ, బీసీ, మైనార్టీ, దళిత వర్గాలు మరియు మహిళల నుండి పరోక్షంగా లాక్కోవడానికి, వారి ఓట్లను జాబితాల నుండి తొలగించడానికి పట్రాంగం జరుగుతోందని, ఈ రకమైన ధోరణి ఎంతమాత్రం మంచిది కాదని ఆయన ఆందోళన వ్యక్తం చేశారు. భారతదేశంలో రాజ్యాంగ శిల్పి డాక్టర్ బి.ఆర్. అంబేడ్కర్ ప్రసాదించిన ఓటు హక్కు ద్వారానే బహుజనులు, మహిళలు రాజకీయ ప్రాతినిధ్యాన్ని పొందుతున్నారని, ప్రస్తుత పరిణామాల్లో సర్వేలు, జాబితాల సవరణల పేరుతో క్షేత్రస్థాయిలోని బలహీన వర్గాల ఓట్లను మాయం చేసే ప్రయత్నాలు సాగుతున్నాయని ఆయన విమర్శించారు. ఎన్నికల నిర్వహణ వ్యవస్థ ప్రజాస్వామ్యబద్ధంగా నడవాల్సింది పోయి, ఏకపక్ష నిర్ణయాలతో విశ్వసనీయతను దెబ్బతీస్తోందని, నిరుపేదల, వెనుకబడిన వర్గాల ఓటు హక్కును కాలరాసే ఏ ప్రయత్నాన్నైనా అడ్డుకుంటామని తేల్చిచెప్పారు. అధికారికంగా తొలగించిన పౌరుల ఓట్లను తక్షణమే పునరుద్ధరించాలని, ఎన్నికల కమిషన్ తన ఏకపక్ష వైఖరిని మార్చుకోకపోతే దేశవ్యాప్తంగా ప్రజాస్వామ్యవాదులు, ప్రజలతో కలిసి పెద్ద ఎత్తున ఆందోళనలు చేపడతామని మేడ సైదులు హెచ్చరించారు.

Govardhan PulijalaAY24-R-0004· 25 Sep 2026 · 13:00