పండుగ రద్దీని దృష్టిలో ఉంచుకుని ప్రత్యేక సర్వీసులకు ఏర్పాట్లు

అక్టోబర్ 9, 10, 16, 17 తేదీల్లో ప్రయాణికుల రద్దీ ఎక్కువగా ఉండే అవకాశం

30 మంది బృందంగా బుక్ చేసుకుంటే కాలనీలు, హాస్టళ్ల వద్దకే బస్సు

హైదరాబాద్, అక్టోబర్ 08, 2026, AYUSH24 NEWS ప్రతినిధి:

దసరా పండుగ సందర్భంగా సొంతూళ్లకు వెళ్లే ప్రయాణికులకు రవాణా సౌకర్యాలు కల్పించేందుకు తెలంగాణ రాష్ట్ర రోడ్డు రవాణా సంస్థ (టీజీఎస్‌ఆర్టీసీ) ప్రత్యేక ఏర్పాట్లు చేపట్టింది. పండుగ రద్దీని దృష్టిలో ఉంచుకుని రాష్ట్రవ్యాప్తంగా 7 వేల ప్రత్యేక బస్సు సర్వీసులను నడపాలని నిర్ణయించింది.

ప్రయాణికుల రద్దీ ఎక్కువగా ఉండే ప్రాంతాలు, ప్రధాన బస్టాండ్లు, రవాణా మార్గాలను పరిగణనలోకి తీసుకుని జోన్లు, రీజియన్ల వారీగా ప్రత్యేక బస్సులను కేటాయించింది.

జోన్ల వారీగా ప్రత్యేక బస్సుల వివరాలు

కరీంనగర్ జోన్ పరిధిలో ఆదిలాబాద్ రీజియన్‌కు 431, నిజామాబాద్‌కు 719, కరీంనగర్‌కు 1,175, వరంగల్‌కు 530, ఖమ్మం రీజియన్‌కు 678 ప్రత్యేక బస్సులను కేటాయించారు.

హైదరాబాద్ జోన్ పరిధిలో మహబూబ్‌నగర్‌కు 645, మెదక్‌కు 255, నల్లగొండకు 815, రంగారెడ్డి రీజియన్‌కు 440 ప్రత్యేక సర్వీసులను నడపనున్నారు. గ్రేటర్ హైదరాబాద్ జోన్ నుంచి మరో 1,312 ప్రత్యేక బస్సులను అందుబాటులో ఉంచనున్నారు.

అక్టోబర్ 9, 10, 16, 17 తేదీల్లో అధిక రద్దీకి అవకాశం

దసరా పండుగ నేపథ్యంలో అక్టోబర్ 9, 10, 16, 17 తేదీల్లో ప్రయాణికుల రద్దీ ఎక్కువగా ఉండే అవకాశం ఉందని ఆర్టీసీ యాజమాన్యం అంచనా వేసింది. ఆయా రోజుల్లో ప్రయాణికుల అవసరాలకు అనుగుణంగా అదనపు బస్సులను అందుబాటులో ఉంచేందుకు ప్రణాళిక సిద్ధం చేసింది.

అలాగే పండుగ అనంతరం అక్టోబర్ 25, 26 తేదీల్లో తిరుగు ప్రయాణాలు అధికంగా ఉండే అవకాశం ఉన్నందున ప్రత్యేక ఏర్పాట్లు చేపట్టనున్నట్లు తెలిపింది.

30 మంది ఉంటే వారి ప్రాంతానికే బస్సు

ఈ ఏడాది దసరా పండుగ సందర్భంగా విద్యార్థులు, ఉద్యోగులు, ఇతర ప్రయాణికుల సౌకర్యార్థం టీజీఎస్‌ఆర్టీసీ ప్రత్యేక పికప్ సదుపాయాన్ని కల్పించింది.

గ్రేటర్ హైదరాబాద్ పరిధిలోని కాలనీలు, టౌన్‌షిప్‌లు, హాస్టళ్లు, కళాశాలల నుంచి కనీసం 30 మంది ప్రయాణికులు ఒక బృందంగా ఏర్పడి ముందస్తుగా బుక్ చేసుకుంటే, వారి ప్రాంతానికే బస్సును పంపి ప్రయాణికులను ఎక్కించుకునే సదుపాయం కల్పించనున్నట్లు తెలిపింది.

పండుగ సందర్భంగా ప్రయాణికులు తమ ప్రయాణాలను ముందుగానే ప్రణాళిక చేసుకుని ఆర్టీసీ ప్రత్యేక సర్వీసులను వినియోగించుకోవాలని సంస్థ సూచించింది.

KAVETI SAMMAIAHAY24-R-0006· 09 Oct 2026 · 03:12