మంథనిలో కంప్యూటర్ ల్యాబ్ ప్రారంభించిన మంత్రి

నవంబర్ 1న మంథనికి గణపతి సచ్చిదానంద సరస్వతి స్వామి రాక

హెలిప్యాడ్, ఇతర ఏర్పాట్లను పరిశీలించిన శ్రీధర్ బాబు

మూడు బ్యారేజీలు నిర్మించినా ఒక్క ఎకరాకూ సాగునీరు అందలేదు: మంత్రి విమర్శ

మంథని, అక్టోబర్ 27, 2026, AYUSH24 NEWS ప్రతినిధి:

ప్రజలకు మేలు చేయడమే కాంగ్రెస్ ప్రజా ప్రభుత్వ ప్రధాన లక్ష్యమని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు అన్నారు. మంగళవారం పెద్దపల్లి జిల్లా మంథని పట్టణంలో పర్యటించిన మంత్రి పలు కార్యక్రమాల్లో పాల్గొన్నారు. స్థానిక ప్రభుత్వ ఉన్నత పాఠశాలలో బాల వికాస ఆధ్వర్యంలో ఏర్పాటు చేసిన కంప్యూటర్ ల్యాబ్‌ను ప్రారంభించారు.

ఈ సందర్భంగా పాఠశాల విద్యార్థులతో కాసేపు ముచ్చటించిన మంత్రి, ఆధునిక సాంకేతిక పరిజ్ఞానాన్ని అందిపుచ్చుకుని విద్యారంగంలో ఉన్నత శిఖరాలకు చేరుకోవాలని సూచించారు. విద్యార్థులు కంప్యూటర్ విద్యను సద్వినియోగం చేసుకోవాలని ఆకాంక్షించారు.

నవంబర్ 1న మంథనికి గణపతి సచ్చిదానంద సరస్వతి స్వామి

బ్రహ్మశ్రీ గణపతి సచ్చిదానంద సరస్వతి స్వామి నవంబర్ 1న మంథని పట్టణానికి విచ్చేయనున్న నేపథ్యంలో పట్టణంలోని అయ్యగారి చెరువు సమీపంలో ఏర్పాటు చేసిన హెలిప్యాడ్‌తో పాటు ఇతర ఏర్పాట్లను మంత్రి శ్రీధర్ బాబు పరిశీలించారు.

స్వామివారి రాక సందర్భంగా భక్తులకు ఎలాంటి ఇబ్బందులు కలగకుండా ఏర్పాట్లు చేస్తున్నట్లు తెలిపారు. ఈ ఆధ్యాత్మిక కార్యక్రమానికి గురు ప్రముఖులు, మంథని పట్టణ పెద్దలను స్వయంగా ఆహ్వానించినట్లు వెల్లడించారు.

నవంబర్ 1న మధ్యాహ్నం స్వామివారు మంథనిలోని దత్తాత్రేయ స్వామి ఆలయానికి చేరుకుని ప్రత్యేక పూజలు నిర్వహిస్తారని తెలిపారు. అనంతరం శివకిరణ్ గార్డెన్స్‌లో ఏర్పాటు చేసిన ప్రత్యేక కార్యక్రమంలో భక్తులను ఉద్దేశించి ప్రవచనాలు అందించి, దివ్యాశీస్సులు అందజేస్తారని వివరించారు.

ప్రాంత ప్రజలందరూ సుఖసంతోషాలతో, ఆయురారోగ్యాలతో ఉండాలని స్వామివారిని ప్రార్థిస్తున్నట్లు మంత్రి పేర్కొన్నారు. భక్తులందరూ ఈ ఆధ్యాత్మిక కార్యక్రమంలో పాల్గొని స్వామివారి ఆశీస్సులు పొందాలని కోరారు.

మూడు బ్యారేజీలతో ఒక్క ఎకరాకూ సాగునీరు అందలేదు

అనంతరం విలేకరులతో మాట్లాడిన మంత్రి శ్రీధర్ బాబు తుమ్మిడిహెట్టి ప్రాజెక్టు, బ్యారేజీల నిర్మాణం, గత ప్రభుత్వ విధానాలపై స్పందించారు.

గత ప్రభుత్వం సాంకేతిక కారణాలు, నదీ పరివాహక ప్రాంత పరిస్థితులు, ప్రాజెక్టుల రీడిజైనింగ్ పేరుతో మూడు బ్యారేజీల నిర్మాణం చేపట్టిందని తెలిపారు.

ఈ బ్యారేజీల నిర్మాణం కారణంగా ఆయా ప్రాంతాల్లో ప్రజలు తమ భూములు, ఇళ్లు, జీవనోపాధి మార్గాలను కోల్పోయారని పేర్కొన్నారు. అయినప్పటికీ ఆ బ్యారేజీల ద్వారా ఒక్క ఎకరానికి కూడా సాగునీరు అందలేదని విమర్శించారు.

ఈ పరిస్థితులకు స్థానిక ప్రజలే ప్రత్యక్ష సాక్షులని మంత్రి వ్యాఖ్యానించారు.

మహారాష్ట్ర నీటిపారుదల శాఖ మంత్రిపై విమర్శలు

తుమ్మిడిహెట్టి ప్రాజెక్టుకు సంబంధించిన అంశాలపై మహారాష్ట్ర నీటిపారుదల శాఖ మంత్రి సరైన సమాధానం చెప్పలేకపోతున్నారని శ్రీధర్ బాబు ఆరోపించారు.

ప్రజా ప్రభుత్వం చేపడుతున్న ప్రాజెక్టుల కార్యాచరణను అడ్డుకునేందుకు కొందరు ప్రయత్నిస్తున్నారని విమర్శించారు. ఎన్ని అడ్డంకులు ఎదురైనా ప్రజలకు మేలు చేసే కార్యక్రమాలను కొనసాగిస్తామని స్పష్టం చేశారు.

అభివృద్ధి, సాగునీటి ప్రయోజనాలకు కట్టుబడి ఉన్నాం

ప్రజల అవసరాలను దృష్టిలో ఉంచుకుని అభివృద్ధి కార్యక్రమాలు చేపట్టడంతో పాటు సాగునీటి ప్రయోజనాలను అందించేందుకు ప్రభుత్వం కట్టుబడి ఉందని మంత్రి శ్రీధర్ బాబు తెలిపారు.

ప్రజా సంక్షేమం, అభివృద్ధి లక్ష్యంగా తమ ప్రభుత్వం ముందుకు సాగుతుందని పేర్కొన్నారు.

ఈ కార్యక్రమాల్లో సంబంధిత శాఖల అధికారులు, స్థానిక ప్రజాప్రతినిధులు తదితరులు పాల్గొన్నారు.