భారత యురేనియం మైనింగ్, ప్రాసెసింగ్ సామర్థ్యాల అభివృద్ధిలో ఆరు దశాబ్దాల ప్రయాణం
జాదుగూడలో జర్నలిస్టుల వర్క్‌షాప్, డీఏఈ టెక్నాలజీ ఎగ్జిబిషన్

న్యూఢిల్లీ, అక్టోబర్ 05, 2026, AYUSH24 NEWS ప్రతినిధి:

భారత అణుశక్తి విభాగం (డీఏఈ) పరిధిలోని ప్రభుత్వ రంగ సంస్థ యురేనియం కార్పొరేషన్ ఆఫ్ ఇండియా లిమిటెడ్ (యూసీఐఎల్) డైమండ్ జూబ్లీ సంవత్సరాన్ని జరుపుకుంది. 1967 అక్టోబర్ 4న ఏర్పాటైన యూసీఐఎల్, దేశంలో యురేనియం మైనింగ్, ప్రాసెసింగ్ సామర్థ్యాల అభివృద్ధితో పాటు భారత అణుశక్తి కార్యక్రమానికి ఆరు దశాబ్దాలుగా అందిస్తున్న సేవలను ఈ సందర్భంగా గుర్తుచేసుకున్నట్లు పీఐబీ తెలిపింది.

జాదుగూడలో నిర్వహించిన డైమండ్ జూబ్లీ వేడుకలకు అటామిక్ ఎనర్జీ కమిషన్ మెంబర్-ఫైనాన్స్ సీమా జైన్ ముఖ్య అతిథిగా హాజరయ్యారు. ఆమె జాదుగూడలోని టెక్నాలజీ డెమాన్‌స్ట్రేషన్ పైలట్ ప్లాంట్‌ను సందర్శించడంతో పాటు, జాదుగూడ భూగర్భ గనిలో 815 మీటర్ల స్థాయిలో ప్రతిపాదించిన సాహా ఇన్‌స్టిట్యూట్ ఆఫ్ న్యూక్లియర్ ఫిజిక్స్‌కు చెందిన నూతన డార్క్ మ్యాటర్ ల్యాబొరేటరీ స్థలాన్ని పరిశీలించారు.

ఈ సందర్భంగా సీమా జైన్ మాట్లాడుతూ, యూసీఐఎల్ డైమండ్ జూబ్లీ ఆరు దశాబ్దాల శాస్త్రీయ సామర్థ్యం, సంస్థాగత అనుభవం, దేశానికి అందించిన సేవలకు గుర్తింపుగా నిలుస్తుందని పేర్కొన్నారు. భారత యురేనియం మైనింగ్, ప్రాసెసింగ్ సామర్థ్యాలకు పునాదులు వేసిన డాక్టర్ హోమీ జహంగీర్ భాభాతో పాటు ఇతర మార్గదర్శకుల సేవలను స్మరించుకున్నారు. భారత అణుశక్తి రంగం విస్తరిస్తున్న నేపథ్యంలో సాంకేతికత, వ్యవస్థలు, మానవ వనరుల సామర్థ్యాన్ని మరింత బలోపేతం చేసుకోవాల్సిన అవసరాన్ని ప్రస్తావించారు.

అణుశక్తి విభాగం కార్యదర్శి, అటామిక్ ఎనర్జీ కమిషన్ చైర్మన్ డాక్టర్ అజిత్ కుమార్ మొహంతి యూసీఐఎల్‌కు శుభాకాంక్షలు తెలియజేశారు. భారత న్యూక్లియర్ ఎనర్జీ మిషన్ ముందుకు సాగుతున్న నేపథ్యంలో ఆవిష్కరణలు, సామర్థ్య నిర్మాణాన్ని కొనసాగించడం ముఖ్యమని పేర్కొన్నారు.

జర్నలిస్టులకు ప్రత్యేక వర్క్‌షాప్

డైమండ్ జూబ్లీ కార్యక్రమాల్లో భాగంగా నర్వాపహార్‌లోని ఇన్ఫర్మేషన్ సెంటర్‌లో ప్రత్యేకంగా జర్నలిస్టుల వర్క్‌షాప్ నిర్వహించారు. మీడియా ప్రతినిధులు యూసీఐఎల్ యురేనియం మైనింగ్, మిల్లింగ్ కేంద్రాలను సందర్శించి గనుల కార్యకలాపాలు, ఖనిజ నిర్వహణ, ప్రాసెసింగ్ వ్యవస్థలు, అక్కడ అమలు చేస్తున్న సాంకేతిక విధానాలను ప్రత్యక్షంగా తెలుసుకునే అవకాశం కల్పించారు.

డీఏఈ విభాగాలు, సంస్థలు అభివృద్ధి చేసిన సాంకేతికతలు, వాటి పారిశ్రామిక, సామాజిక ఉపయోగాలను వివరిస్తూ ప్రత్యేక డీఏఈ టెక్నాలజీ ఎగ్జిబిషన్ నిర్వహించారు. పాఠశాల విద్యార్థులకు అణుశక్తి, సంబంధిత సాంకేతికతల అనువర్తనాలను పరిచయం చేశారు.

యూసీఐఎల్ చైర్మన్ అండ్ మేనేజింగ్ డైరెక్టర్ డాక్టర్ కాచం ఆనంద్ రావు మాట్లాడుతూ, డైమండ్ జూబ్లీ యూసీఐఎల్ కుటుంబంలోని ప్రతి ఒక్కరికీ ముఖ్యమైన మైలురాయిగా పేర్కొన్నారు. ఆరు దశాబ్దాల్లో యురేనియం మైనింగ్, ప్రాసెసింగ్‌లో నైపుణ్యం, మౌలిక సదుపాయాలను అభివృద్ధి చేయడంతో పాటు సాంకేతికత, భద్రత, పర్యావరణ నిర్వహణ సామర్థ్యాలను బలోపేతం చేసినట్లు తెలిపారు.

1967లో ఏర్పాటైన యూసీఐఎల్ భూగర్భ, ఓపెన్‌కాస్ట్ మైనింగ్ నుంచి ఖనిజ ప్రాసెసింగ్, సాంకేతిక అభివృద్ధి, వృత్తిపరమైన భద్రత, రేడియేషన్ రక్షణ, పర్యావరణ నిర్వహణ వరకు వివిధ రంగాల్లో తన సామర్థ్యాలను విస్తరించిందని పీఐబీ పేర్కొంది.