19 ఏళ్లుగా సేవలందిస్తున్న ల్యాబ్ టెక్నీషియన్లు, ఫార్మసిస్టులకు ఉద్యోగ భద్రత కల్పించాలని డిమాండ్

అర్హతలకు సంబంధం లేని హోదాల్లో పునఃకేటాయింపులపై ఉద్యోగుల ఆందోళన

పెండింగ్ జీతాలు విడుదల చేయాలి.. మిగిలిన ఉద్యోగులను IFIMSలో చేర్చాలని విజ్ఞప్తి

హైదరాబాద్, అక్టోబర్ 22, 2026, AYUSH24 NEWS ప్రతినిధి:

గత 19 సంవత్సరాలుగా 104 ఎఫ్‌డీహెచ్‌ఎస్ (104 FDHS) సంచార వైద్య సేవల పథకంలో మెడికల్ ల్యాబ్ టెక్నీషియన్లు, ఫార్మసిస్టులుగా పనిచేస్తున్న తమకు ఉద్యోగ భద్రత కల్పించాలని 104 ఉద్యోగులు తెలంగాణ రాష్ట్ర ప్రభుత్వాన్ని కోరారు. తమ విద్యార్హతలు, అనుభవం, స్థానికత, కుటుంబ పరిస్థితులను పరిగణనలోకి తీసుకోకుండా ఇతర జిల్లాలకు, సంబంధం లేని హోదాల్లో పునఃకేటాయింపులు చేయడంతో తీవ్ర ఇబ్బందులు ఎదుర్కొంటున్నామని ఆవేదన వ్యక్తం చేశారు.

ముందస్తు సమాచారం లేకుండా చేపట్టిన పునఃకేటాయింపులను పునఃపరిశీలించి, తమను సొంత జిల్లాల్లో లేదా సమీప ప్రాంతాల్లో గతంలో నిర్వహించిన హోదాల్లోనే కొనసాగించాలని విజ్ఞప్తి చేశారు.

19 ఏళ్ల సేవకు ఉద్యోగ భద్రత ఏది?

దివంగత ముఖ్యమంత్రి డాక్టర్ వైఎస్ రాజశేఖర రెడ్డి ప్రవేశపెట్టిన 104 వైద్య సేవల పథకంలో రూల్ ఆఫ్ రిజర్వేషన్, రోస్టర్ పాయింట్లను అనుసరించి డీఎస్సీ స్థాయి ఎంపిక ప్రక్రియ ద్వారా తాము నియామకాలు పొందినట్లు ఉద్యోగులు తెలిపారు.

అనంతరం టెన్ మెన్ కమిటీ ద్వారా తమ నియామకాలు, సేవలను పునఃపరిశీలించి పునర్నియామక ప్రక్రియ చేపట్టినట్లు పేర్కొన్నారు.

గతంలో పలు ప్రభుత్వ ఉత్తర్వులు, జీవోల ద్వారా తమ సేవలను క్రమబద్ధీకరించేందుకు చర్యలు చేపట్టినప్పటికీ ఇప్పటివరకు పూర్తిస్థాయి ఉద్యోగ భద్రత లభించలేదని ఆవేదన వ్యక్తం చేశారు.

గత ప్రభుత్వం 104 పథకాన్ని రద్దు చేసిన అనంతరం ప్రత్యేక ఉత్తర్వులు లేకుండానే తమను ప్రాథమిక ఆరోగ్య కేంద్రాలు (పీహెచ్‌సీలు), ఇతర ఆరోగ్య విభాగాల్లో సర్దుబాటు చేశారని తెలిపారు. అప్పటి నుంచి తమ ఉద్యోగ పరిస్థితి అనిశ్చితిలో కొనసాగుతోందని పేర్కొన్నారు.

అర్హతలకు సంబంధం లేని పోస్టుల్లో పునఃకేటాయింపులు

ప్రస్తుత ప్రభుత్వం అధికారంలోకి వచ్చిన తరువాత కూడా తమ సమస్యలకు శాశ్వత పరిష్కారం లభించలేదని ఉద్యోగులు తెలిపారు.

కొంతమంది ల్యాబ్ టెక్నీషియన్లను మెడికల్ కాలేజీలకు, ఫార్మసిస్టులను డీహెచ్ (DH), ఆయుష్, డీఎంఈ (DME) తదితర విభాగాలకు కేటాయించినట్లు వివరించారు.

మరికొందరికి వారి అసలు హోదాలకు భిన్నంగా డెంటల్ టెక్నీషియన్, అసిస్టెంట్ ఫిజియోథెరపిస్ట్, ఎన్‌ఎస్‌టీఏ అసిస్టెంట్ వంటి పోస్టులు కేటాయించారని తెలిపారు.

తమ విద్యార్హతలు, 19 సంవత్సరాల అనుభవానికి సంబంధం లేని హోదాల్లో పనిచేయాల్సిన పరిస్థితి ఏర్పడుతోందని ఆందోళన వ్యక్తం చేశారు.

ఇలాంటి హోదాల మార్పుల వల్ల భవిష్యత్తులో సీనియారిటీ, పదోన్నతులు, సర్వీసు క్రమబద్ధీకరణ, ఇతర ఉద్యోగ ప్రయోజనాలకు నష్టం కలిగే ప్రమాదం ఉందని పేర్కొన్నారు.

సొంత జిల్లాలకు దూరంగా పోస్టింగ్‌లు

పునఃకేటాయింపుల్లో స్థానికతను పరిగణనలోకి తీసుకోకుండా దూర ప్రాంతాల్లోని మెడికల్ కాలేజీలకు పంపించడంతో రోజువారీ విధులకు హాజరుకావడం కష్టంగా మారిందని ఉద్యోగులు తెలిపారు.

యాదాద్రి భువనగిరి జిల్లాకు చెందిన కొందరు 104 ల్యాబ్ టెక్నీషియన్లు, ఫార్మసిస్టులకు ఖమ్మం జిల్లాలో పోస్టింగ్‌లు కేటాయించగా, సంగారెడ్డి జిల్లాకు చెందిన కొందరిని కొడంగల్ మెడికల్ కాలేజీలకు కేటాయించినట్లు వివరించారు.

కొంతమంది ఉద్యోగులు రోజుకు సుమారు 230 కిలోమీటర్ల వరకు ప్రయాణించి విధులకు హాజరుకావాల్సి వస్తోందని ఆవేదన వ్యక్తం చేశారు.

ఉద్యోగుల్లో దాదాపు అందరూ 40 సంవత్సరాలు దాటినవారేనని, కొందరు పదవీ విరమణకు దగ్గరగా ఉన్నారని పేర్కొన్నారు. కుటుంబ బాధ్యతలు, ప్రయాణ ఖర్చులు, ఆరోగ్య సమస్యలు, ఆర్థిక ఇబ్బందుల నేపథ్యంలో దూర ప్రాంతాల్లో విధులు నిర్వహించడం కష్టసాధ్యంగా మారిందని తెలిపారు.

దసరా నాటికి జీతాల సమస్య పరిష్కరిస్తామన్న హామీ అమలు కాలేదు

తమ సమస్యలను రాష్ట్ర ఆరోగ్యశాఖ మంత్రి దృష్టికి పలుమార్లు తీసుకెళ్లినట్లు ఉద్యోగులు తెలిపారు.

పెండింగ్ జీతాలతోపాటు ఇతర సమస్యలను దసరా పండుగ నాటికి పరిష్కరిస్తామని హామీ ఇచ్చినప్పటికీ ఆశించిన ఫలితం లభించలేదని ఆవేదన వ్యక్తం చేశారు.

పండుగ సమయానికి పెండింగ్ జీతాలు అందుతాయని ఆశించిన తమకు నిరాశే మిగిలిందని పేర్కొన్నారు.

మరోవైపు, కొత్తగా కేటాయించిన మెడికల్ కాలేజీలు, సంబంధిత ఏజెన్సీల నుంచి విధుల్లో చేరాలని, చేరితేనే జీతాలు వస్తాయన్న విధంగా ఫోన్ కాల్స్ వస్తున్నాయని తెలిపారు.

ఇప్పటికే జీతాలు అందక ఆర్థిక ఇబ్బందులు ఎదుర్కొంటున్న తమపై ఈ పరిస్థితి మరింత ఒత్తిడి పెంచుతోందని అన్నారు.

ఉద్యోగ భద్రతపై స్పష్టమైన ఉత్తర్వులు ఇవ్వాలి

ముందస్తు సమాచారం, స్పష్టమైన మార్గదర్శకాలు, ఉద్యోగులతో సంప్రదింపులు లేకుండా పునఃకేటాయింపులు చేపట్టడంతో అనేకమంది ఉద్యోగులు అయోమయంలో ఉన్నారని తెలిపారు.

కొత్త పోస్టుల్లో చేరాలా, తమ అసలు హోదాల్లో కొనసాగాలా, భవిష్యత్తులో సర్వీసు పరిస్థితి ఏమవుతుందనే అంశాలపై స్పష్టత లేదని పేర్కొన్నారు.

తమను కొత్త ఉద్యోగులుగా కాకుండా 19 సంవత్సరాలుగా వైద్య సేవలు అందిస్తున్న అనుభవజ్ఞులుగా గుర్తించాలని ప్రభుత్వాన్ని కోరారు.

ప్రభుత్వానికి 104 ఉద్యోగుల ప్రధాన డిమాండ్లు

104 ఉద్యోగుల సమస్యల పరిష్కారానికి ప్రభుత్వం తక్షణమే చర్యలు తీసుకోవాలని కోరుతూ పలు డిమాండ్లను వెల్లడించారు.

1. గత 19 సంవత్సరాలుగా సేవలందిస్తున్న 104 మెడికల్ ల్యాబ్ టెక్నీషియన్లు, ఫార్మసిస్టులకు ఉద్యోగ భద్రత కల్పించాలి.
2. ల్యాబ్ టెక్నీషియన్లను ల్యాబ్ టెక్నీషియన్లుగానే, ఫార్మసిస్టులను ఫార్మసిస్టులుగానే కొనసాగించాలి.
3. డెంటల్ టెక్నీషియన్, అసిస్టెంట్ ఫిజియోథెరపిస్ట్, ఎన్‌ఎస్‌టీఏ అసిస్టెంట్ వంటి సంబంధం లేని హోదాల్లో చేసిన పునఃకేటాయింపులను సవరించాలి.
4. ఉద్యోగులను వారి సొంత జిల్లాల్లో లేదా సమీప ప్రాంతాల్లోని ఆరోగ్య సంస్థలకు కేటాయించాలి.
5. ముందస్తు సమాచారం, ఉద్యోగుల అభిప్రాయాల సేకరణ లేకుండా చేసిన దూర ప్రాంతాల పునఃకేటాయింపులను సమీక్షించాలి.
6. పెండింగ్ జీతాలను వెంటనే విడుదల చేసి, భవిష్యత్తులో సకాలంలో చెల్లించేలా చర్యలు తీసుకోవాలి.
7. గత సర్వీసు, సీనియారిటీ, విద్యార్హతలు, పదోన్నతులు, ఇతర సేవా ప్రయోజనాలకు నష్టం కలగకుండా స్పష్టమైన ప్రభుత్వ ఉత్తర్వులు జారీ చేయాలి.
8. ఆరోగ్యశాఖ ఉన్నతాధికారులు, సంబంధిత విభాగాల అధికారులు, ఉద్యోగుల ప్రతినిధులతో సమావేశం ఏర్పాటు చేసి శాశ్వత పరిష్కారం చూపాలి.
9. ఇంకా IFIMS ప్రక్రియ పూర్తికాని ఉద్యోగులను వెంటనే IFIMSలో చేర్చి, వారికి కూడా జీతాలు అందేలా చర్యలు తీసుకోవాలి.

మానవతా దృక్పథంతో న్యాయం చేయాలి

గత 19 సంవత్సరాలుగా ప్రజలకు వైద్య సేవలు అందించిన తమకు ఉద్యోగ భద్రత లేకపోవడం, జీతాలు పెండింగ్‌లో ఉండటం, కుటుంబాలకు దూరంగా పోస్టింగ్‌లు కేటాయించడం బాధాకరమని ఉద్యోగులు పేర్కొన్నారు.

తమ సుదీర్ఘ సేవలను గుర్తించి, గతంలో నిర్వహించిన విధుల ప్రకారమే కొనసాగింపు ఉత్తర్వులు జారీ చేయాలని కోరారు.

ఉద్యోగుల కుటుంబాల భవిష్యత్తును దృష్టిలో ఉంచుకొని ప్రభుత్వం మానవతా దృక్పథంతో స్పందించాలని, పెండింగ్ జీతాలను విడుదల చేసి ఉద్యోగ భద్రతకు హామీ ఇవ్వాలని విజ్ఞప్తి చేశారు.

సమావేశంలో పాల్గొన్నవారు

ఈ సమావేశంలో ఎం.డి. నుష్రత్ మహియుద్దీన్, కల్పన శివరాజ్, నిజాముద్దీన్, ఎం.ఏ. హాది, కిరణ్, నరేష్ తదితరులు పాల్గొన్నారు.

AYUSH24 NEWS | The Voice of Truth