44 వసంతాల సేవా ప్రస్థానంలో మరో మైలురాయికి సిద్ధమైన మంథని విద్యార్థి యువత

2000వ కార్యక్రమం నిర్వహణపై సన్నాహక సమావేశం

విద్య, వైద్యం, సాహిత్యం, సామాజిక సేవా రంగాల్లో 25 అంశాలపై కార్యక్రమాలు

మంథని, నవంబర్ 6, 2026, AYUSH24 NEWS ప్రతినిధి:

స్వచ్ఛంద సేవా స్ఫూర్తితో 44 వసంతాలుగా వివిధ సామాజిక కార్యక్రమాలను నిర్వహిస్తున్న మంథని విద్యార్థి యువత సంస్థ ఆధ్వర్యంలో చేపట్టనున్న 2000వ కార్యక్రమాన్ని విజయవంతం చేయాలని సంస్థ వ్యవస్థాపక అధ్యక్షుడు కొండేల మారుతి పిలుపునిచ్చారు.

శుక్రవారం మంథనిలోని సంస్థ కార్యాలయంలో చంద్రుపట్ల సుధాకర్ రెడ్డి అధ్యక్షతన 2000వ కార్యక్రమ నిర్వహణకు సంబంధించి సమాలోచన, సన్నాహక సమావేశం నిర్వహించారు.

ఈ సందర్భంగా మంథని ఉపాధ్యాయ బృందానికి చెందిన లావణ్య, ఉషా, మంజుల, విశ్రాంత ఉపాధ్యాయులు మారుతి, బుచ్చన్న గౌడ్ తదితరులు సునీ సిస్టర్ నేతృత్వంలో జ్యోతి ప్రజ్వలన చేసి సమావేశాన్ని ప్రారంభించారు.

44 ఏళ్లుగా సామాజిక సేవలో మంథని విద్యార్థి యువత

ఈ సందర్భంగా సంస్థ వ్యవస్థాపక అధ్యక్షుడు కొండేల మారుతి మాట్లాడుతూ, మంథని విద్యార్థి యువత సంస్థ 44 ఏళ్లుగా విద్య, వైద్యం, సాహిత్యం, సాంస్కృతిక, సామాజిక రంగాల్లో అనేక సేవా కార్యక్రమాలను నిర్వహిస్తోందని తెలిపారు.

మద్యపాన నివారణపై అవగాహన, మొక్కల పెంపకం, రక్తదాన శిబిరాలు, ప్లాస్టిక్ వినియోగం తగ్గింపు, వినియోగదారుల హక్కులపై అవగాహన తరగతులు, గ్రంథాలయ నిర్వహణ తదితర 25 అంశాలకు సంబంధించిన విభిన్న కార్యక్రమాలను చేపట్టినట్లు వివరించారు.

సమాజంలో చైతన్యం పెంపొందించడం, యువతను సేవా కార్యక్రమాల్లో భాగస్వాములను చేయడం సంస్థ ప్రధాన ఉద్దేశమని పేర్కొన్నారు.

వచ్చే నెలలో 2000వ కార్యక్రమం

రానున్న నెలలో నిర్వహించనున్న సంస్థ 2000వ కార్యక్రమంలో వివిధ రంగాలకు చెందిన నిష్ణాతులు, ప్రముఖులు పాల్గొనేలా కార్యాచరణ రూపొందించినట్లు కొండేల మారుతి వెల్లడించారు.

కార్యక్రమాన్ని విజయవంతం చేసేందుకు త్వరలో మంథని ప్రాంతానికి చెందిన వివిధ ప్రాంతాల్లో నివసిస్తున్న ప్రవాసీయులను సంస్థ ప్రతినిధి బృందం కలిసి సహకారం కోరనున్నట్లు తెలిపారు.

ఈ కార్యక్రమ నిర్వహణ కోసం రామడుగు మారుతీరావు, చంద్రుపట్ల సుధాకర్ రెడ్డి, తాటి బుచ్చన్న గౌడ్, నారమల్ల కృష్ణ, బోగోజు శ్రీనివాస్ తదితరులతో ప్రత్యేక ప్రతినిధి బృందాన్ని ఏర్పాటు చేసినట్లు వివరించారు.

మేరీ మీడియా స్కూల్ హెచ్‌ఎం సునీ సిస్టర్‌కు ఘన సత్కారం

మంథని ప్రాంతంలో విద్యారంగ అభివృద్ధికి విశేష కృషి చేస్తున్న మేరీ మీడియా స్కూల్ ప్రధానోపాధ్యాయురాలు సునీ సిస్టర్ను సమావేశంలో ఘనంగా సత్కరించారు.

విద్యారంగానికి ఆమె అందిస్తున్న సేవలను ఈ సందర్భంగా అభినందించారు.

సేవా కార్యక్రమాల్లో అందరూ భాగస్వాములు కావాలి

44 వసంతాల సేవా ప్రస్థానంలో 2000వ కార్యక్రమం ఒక ముఖ్యమైన మైలురాయిగా నిలవనుందని కొండేల మారుతి పేర్కొన్నారు.

సంస్థ చేపడుతున్న సామాజిక సేవా కార్యక్రమాలకు ఉపాధ్యాయులు, యువత, మేధావులు, వివిధ రంగాల ప్రముఖులు, మంథని ప్రాంత ప్రజలు సహకరించాలని కోరారు.

KAVETI SAMMAIAHAY24-R-0006· 06 Nov 2026 · 12:02