హైదరాబాద్: గ్రాడ్యుయేట్ ఎమ్మెల్సీ ఎన్నికలకు సంబంధించి బీఆర్‌ఎస్ పార్టీ కసరత్తు ప్రారంభించింది. ఇందులో భాగంగా తెలంగాణ భవన్‌లో నల్గొండ జిల్లా పార్టీ నేతలతో బీఆర్‌ఎస్ వర్కింగ్ ప్రెసిడెంట్ కేటీఆర్ సమావేశమయ్యారు. ఈ సమావేశంలో బీఆర్‌ఎస్ నల్గొండ జిల్లా అధ్యక్షుడు, దేవరకొండ మాజీ ఎమ్మెల్యే రమావత్ రవీంద్ర కుమార్ పాల్గొన్నారు.
గ్రాడ్యుయేట్ ఎమ్మెల్సీ ఎన్నికల్లో ఓటర్ల ఎన్‌రోల్‌మెంట్ అత్యంత కీలకమని కేటీఆర్ పేర్కొన్నారు. అర్హత కలిగిన ప్రతి గ్రాడ్యుయేట్ ఓటరుగా నమోదు చేసుకునేలా పార్టీ శ్రేణులు విస్తృతంగా కృషి చేయాలని సూచించారు. ఎన్‌రోల్‌మెంట్‌కు సంబంధించి పార్టీ పరంగా చేపట్టాల్సిన కార్యాచరణపై నేతలకు పలు సూచనలు చేశారు.
ఎన్నికల నోటిఫికేషన్ వెలువడే సమయానికి పార్టీ యంత్రాంగం పూర్తిస్థాయిలో సన్నద్ధంగా ఉండేలా ఇప్పటి నుంచే ప్రణాళిక రూపొందించుకోవాలని కేటీఆర్ సూచించారు. పార్టీ శ్రేణులు సమన్వయంతో పనిచేసేలా బాధ్యతలు, కార్యాచరణపై దిశానిర్దేశం చేశారు.
ఈ సందర్భంగా కాంగ్రెస్ ప్రభుత్వంపై గ్రాడ్యుయేట్లు, విద్యార్థులు, నిరుద్యోగుల్లో వ్యతిరేకత ఉందని కేటీఆర్ పేర్కొన్నారు. రాష్ట్రంలోని వివిధ వర్గాల సమస్యలను గ్రాడ్యుయేట్లు గమనిస్తున్నారని ఆయన అన్నారు. ఈ నేపథ్యంలో గ్రాడ్యుయేట్ ఎమ్మెల్సీ ఎన్నికల్లో కాంగ్రెస్‌కు వ్యతిరేకంగా ఉన్న అభిప్రాయం బీఆర్‌ఎస్‌కు అనుకూలంగా ఓటుగా మారేలా పార్టీ శ్రేణులు పక్కా ప్రణాళికతో పనిచేయాలని పిలుపునిచ్చారు.
గత గ్రాడ్యుయేట్ ఎమ్మెల్సీ ఎన్నికల్లో వరంగల్–ఖమ్మం–నల్గొండ పరిధిలో బీఆర్‌ఎస్ అభ్యర్థి స్వల్ప ఓట్ల తేడాతో ఓటమి పాలైన విషయాన్ని కేటీఆర్ గుర్తుచేశారు. ఈసారి పార్టీ ఎవరిని అభ్యర్థిగా నిలబెట్టినా విజయం కోసం ప్రతి ఒక్కరూ సమన్వయంతో పనిచేయాలని సూచించారు. ఎన్నికలు పార్టీ అభ్యర్థి చుట్టూనే కాకుండా పార్టీ గుర్తింపు, సంస్థాగత బలంపై ఆధారపడి ఉంటాయని పేర్కొంటూ నాయకులు, కార్యకర్తలు ఐకమత్యంతో పనిచేయాలని పిలుపునిచ్చారు.
— Ayush 24 News
The Voice of Truth

Mahamood MohammedAY24-R-0008· 26 Sep 2026 · 13:43