ఎన్ని ఆటంకాలు ఎదురైనా మహనీయుల చరిత్రను చాటి చెబుతామని స్పష్టం
మంథని: సెప్టెంబర్ 26 (AYUSH24 News ప్రతినిధి)
మహనీయుల స్ఫూర్తితో సాధించుకున్న తెలంగాణ రాష్ట్రంలో వారి చరిత్రను కీర్తించి, గౌరవించిన ఘనత బీఆర్‌ఎస్‌ పార్టీదేనని మంథని మాజీ ఎమ్మెల్యే పుట్ట మధూకర్‌ అన్నారు. వీరవనిత చాకలి ఐలమ్మ జయంతి సందర్భంగా మంథని పట్టణంలోని ఆమె విగ్రహానికి పూలమాల వేసి నివాళులర్పించారు.
ఈ సందర్భంగా పుట్ట మధూకర్‌ మాట్లాడుతూ మహనీయుల ఉద్యమ స్ఫూర్తితోనే కేసీఆర్‌ తెలంగాణ ఉద్యమాన్ని ముందుకు తీసుకెళ్లి రాష్ట్రాన్ని సాధించారని పేర్కొన్నారు. డాక్టర్‌ బి.ఆర్‌. అంబేద్కర్‌ రాజ్యాంగంలో పొందుపరిచిన ఆర్టికల్‌ 3 ప్రాధాన్యాన్ని గుర్తించిన కేసీఆర్‌, హైదరాబాద్‌లో 125 అడుగుల అంబేద్కర్‌ విగ్రహాన్ని ఏర్పాటు చేశారని తెలిపారు.
చాకలి ఐలమ్మ, సర్దార్‌ సర్వాయి పాపన్న, కొమురం భీం వంటి మహనీయులు భవిష్యత్‌ తరాల కోసం పోరాటాలు చేశారని, వారి పోరాట స్ఫూర్తిని కొనసాగిస్తూ తెలంగాణలో వారి విగ్రహాలను ఏర్పాటు చేసి స్మరించుకున్నామని చెప్పారు.
అయితే మహనీయుల చరిత్రకు తగిన ప్రాధాన్యం ఇవ్వడం లేదంటూ కాంగ్రెస్‌ పాలనపై పుట్ట మధూకర్‌ విమర్శలు చేశారు. చాకలి ఐలమ్మ జయంతి సందర్భంగా మంథనిలోని ఆమె విగ్రహానికి మున్సిపల్‌ పాలకవర్గం, అధికార యంత్రాంగం పూలమాలలు వేయకపోవడం మహనీయులను అవమానించడమేనని ఆయన ఆరోపించారు.
మంథని ఎమ్మెల్యే దుద్దిళ్ల శ్రీధర్ బాబు నేతృత్వంలో మహనీయుల చరిత్రకు ప్రాధాన్యం తగ్గిస్తూ తన తండ్రికే ప్రాధాన్యం ఇవ్వాలని చూస్తున్నారని పుట్ట మధూకర్‌ ఆరోపించారు. ప్రభుత్వ పరంగా మహనీయుల జయంతులు, వర్ధంతులు నిర్వహిస్తున్నప్పటికీ మంథనిలో వారికి కనీస గౌరవం ఇవ్వడం లేదని విమర్శించారు. ఈ వ్యాఖ్యలు పుట్ట మధూకర్‌ చేసిన రాజకీయ ఆరోపణలుగా పేర్కొనాల్సి ఉంది.
మహనీయుల గురించి ఆలోచించకుండా స్థానిక పాలకవర్గం చాకలి ఐలమ్మ విగ్రహానికి పూలమాల వేయకపోవడాన్ని ఖండిస్తున్నట్లు తెలిపారు. మహనీయుల విగ్రహాలు ఎక్కడ ఉన్నా గౌరవించేలా అధికార యంత్రాంగం చర్యలు తీసుకోవాలని కోరారు.
మంథని ఎమ్మెల్యే తమ సమాజాన్ని ఓట్ల కోసమే ఉపయోగించుకుంటున్నారని పుట్ట మధూకర్‌ ఆరోపించారు. చాకలి ఐలమ్మను గౌరవించకపోవడం సరైన విధానం కాదని పేర్కొన్నారు. భవిష్యత్తులో బీఆర్‌ఎస్‌ అధికారంలోకి వస్తుందని విశ్వాసం వ్యక్తం చేసిన ఆయన, ఎన్ని ఆటంకాలు ఎదురైనా మహనీయుల చరిత్రను ప్రజలకు చాటి చెబుతామని తెలిపారు.
అయుష్ 24 న్యూస్ — The Voice of Truth
Leave a Reply