మంత్రి దుద్దిళ్ల శ్రీధర్ బాబుపై చేసిన వ్యాఖ్యలను ఖండించిన మంథని కాంగ్రెస్ నాయకులు

మంథని, అక్టోబర్ 04, 2026, AYUSH24 NEWS ప్రతినిధి:

మాజీ జెడ్పీటీసీ పుట్ట మధు మంత్రి దుద్దిళ్ల శ్రీధర్ బాబు, ఆయన కుటుంబంపై అనుచిత వ్యాఖ్యలు, అబద్ధపు ప్రచారాలు చేయడం మానుకోవాలని మంథని కాంగ్రెస్ పార్టీ నాయకులు హితవు పలికారు. పుట్ట మధు చేసిన వ్యాఖ్యలను ఖండిస్తూ మంథనిలోని కూరగాయల మార్కెట్‌లో మండల కాంగ్రెస్ పార్టీ ఆధ్వర్యంలో మీడియా సమావేశం నిర్వహించారు.

ఈ సందర్భంగా మంథని మండల కాంగ్రెస్ పార్టీ అధ్యక్షుడు అయిలి ప్రసాద్, మున్సిపల్ చైర్మన్ వోడ్నాల శ్రీనివాస్, వైస్ చైర్మన్ ముస్కుల సయేందర్ రెడ్డి, మార్కెట్ కమిటీ చైర్మన్ కుడుదుల వెంకన్న, విద్యుత్ నియంత్రణ మండలి సభ్యుడు శశిభూషణ్ కాచే, ఎస్సీ సెల్ డివిజన్ అధ్యక్షుడు మంథని సత్యం, సూరయ్యపల్లి గ్రామ సర్పంచ్ ఆర్ల నాగరాజు మాట్లాడారు.

రాష్ట్ర మంత్రి దుద్దిళ్ల శ్రీధర్ బాబుపై అనుచిత వ్యాఖ్యలు చేస్తే సహించబోమని వారు పేర్కొన్నారు. గత పదేళ్ల కాలంలో పుట్ట మధు అక్రమాలకు పాల్పడ్డారని ఆరోపిస్తూ, ప్రజలు ఇప్పటికే ఆయనకు తగిన సమాధానం ఇచ్చారని వ్యాఖ్యానించారు. అయినప్పటికీ రాజకీయ ప్రయోజనాల కోసం అబద్ధపు ప్రచారాలు చేస్తున్నారని విమర్శించారు.

కమిషన్ రాజకీయాలు, ఇసుక దందాలకు పుట్ట మధు పాల్పడ్డారని ఆరోపించిన కాంగ్రెస్ నేతలు, ఇప్పుడు మంథని అభివృద్ధి, ప్రజలపై ప్రేమ ఉన్నట్లు మాట్లాడుతున్నారని విమర్శించారు. మాట్లాడే విధానాన్ని మార్చుకోవాలని పలుమార్లు సూచించినప్పటికీ ఆయన వైఖరిలో మార్పు రావడం లేదన్నారు. రాజకీయ ఉనికిని కాపాడుకునే ప్రయత్నంలోనే విమర్శలు చేస్తున్నారని ఆరోపించారు.

మంథని ప్రాంత ప్రజలను విద్య, వైద్యం, ఉపాధి సహా అన్ని రంగాల్లో అభివృద్ధి చేయాలనే సంకల్పంతో రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు కృషి చేస్తున్నారని పేర్కొన్నారు. శ్రీధర్ బాబు, శ్రీనుబాబులను ఏకవచనంతో సంబోధిస్తూ వారి కుటుంబంపై అమర్యాదకరంగా మాట్లాడడం సరికాదని, పుట్ట మధు వ్యాఖ్యలను తీవ్రంగా ఖండిస్తున్నామని తెలిపారు.

మంథని మున్సిపల్ పాలకవర్గం కాంగ్రెస్ పార్టీ నాయకులు, కార్యకర్తల కృషితో ఏర్పడిందని పేర్కొన్నారు. గత మున్సిపల్ ఎన్నికల్లో పుట్ట శైలజను ఎందుకు పోటీలో నిలబెట్టలేదని పుట్ట మధును ప్రశ్నించారు. అధికారంలో ఉన్నప్పుడు భార్యను చైర్మన్‌గా చేశారని, ప్రస్తుతం ఓటమి భయంతోనే ఆమెను పోటీలో నిలబెట్టలేదని కాంగ్రెస్ నేతలు ఆరోపించారు.

కార్యక్రమంలో ప్రజాప్రతినిధులు, చైర్మన్లు, వైస్ చైర్మన్లు, మున్సిపల్ కౌన్సిలర్లు, సీనియర్ నాయకులు, మాజీ ప్రజాప్రతినిధులు, గ్రామ సర్పంచులు, ఉప సర్పంచులు, యూత్ కాంగ్రెస్ నాయకులు, మహిళా కాంగ్రెస్ నాయకులు, అనుబంధ సంఘాల నాయకులు, కాంగ్రెస్ పార్టీ కార్యకర్తలు తదితరులు పాల్గొన్నారు.