ఇంటిగ్రేటెడ్ స్కూల్ కోసం తీసుకున్న భూమికి భూమి లేదా ఎకరానికి రూ.50 లక్షల పరిహారం ఇవ్వాలని డిమాండ్

తాండూర్ ఎమ్మెల్యే మనోహర్ రెడ్డికి వినతిపత్రం అందజేసిన రైతులు, ప్రజా సంఘాల నాయకులు

యాలాల, సెప్టెంబర్ 13 — అయుష్ 24 న్యూస్:

యాలాల మండలం దౌలాపూర్ రెవెన్యూ గ్రామ పరిధిలో ఇంటిగ్రేటెడ్ స్కూల్ నిర్మాణం కోసం తీసుకున్న దళిత, పేద రైతుల భూములకు తగిన నష్టపరిహారం అందించాలని కోరుతూ రైతులు, ప్రజా సంఘాల నాయకులు తాండూర్ ఎమ్మెల్యే మనోహర్ రెడ్డికి వినతిపత్రం అందజేశారు.

ఆదివారం హైదరాబాద్‌లోని ఎమ్మెల్యే నివాసంలో ఆయనను కలిసి భూ సమస్యను వివరించారు. భూములకు నష్టపరిహారం అందించడంతో పాటు, అవసరమైతే భూమికి భూమి ఇవ్వాలని లేదా ఎకరానికి రూ.50 లక్షల పరిహారం చెల్లించాలని వారు కోరారు. భూసేకరణ చట్టం ప్రకారం చర్యలు తీసుకోవాలని విజ్ఞప్తి చేశారు.

1980లో పేదలకు భూ పంపిణీ జరిగిందని వెల్లడి

ఈ సందర్భంగా కేవీపీఎస్ రాష్ట్ర సహాయ కార్యదర్శి ఉప్పలి మల్కయ్య, వ్యవసాయ కార్మిక సంఘం జిల్లా అధ్యక్షులు యు. బుగ్గప్ప, ఎంఆర్‌పీఎస్ జిల్లా నాయకులు డప్పు మహేందర్ మాట్లాడుతూ దౌలాపూర్ రెవెన్యూ గ్రామ పరిధిలోని సర్వే నంబర్ 73లో చెన్నారం, దౌలాపూర్ గ్రామాలకు చెందిన దళిత, వడ్డె సామాజిక వర్గాల పేద రైతులకు 1980లో అప్పటి ప్రభుత్వం భూమిని పంపిణీ చేసిందని తెలిపారు.

సుమారు 25 ఎకరాల భూమిని 11 కుటుంబాలకు సాగు చేసుకునేందుకు పంపిణీ చేసినట్లు వారు పేర్కొన్నారు. అప్పటి నుంచి ఆయా కుటుంబాలు భూములను సాగు చేసుకుంటూ జీవనం కొనసాగిస్తున్నాయని తెలిపారు.

అయితే ప్రస్తుతం ఇంటిగ్రేటెడ్ స్కూల్ నిర్మాణం పేరుతో రైతులకు సరైన సమాచారం ఇవ్వకుండానే వారి పొలాల నుంచి ఎర్రమట్టిని తరలించారని, దీంతో భూములు సాగుకు అనుకూలంగా లేకుండా పోయాయని వారు ఆరోపించారు.

భూసేకరణ చట్టం ప్రకారం పరిహారం ఇవ్వాలి

భూములు తీసుకున్న రైతులకు ఇప్పటివరకు ఎలాంటి నష్టపరిహారం అందలేదని ప్రజా సంఘాల నాయకులు ఆరోపించారు. అధికారుల తీరుపై వారు అసంతృప్తి వ్యక్తం చేశారు.

2013 భూసేకరణ చట్టం ప్రకారం రైతుల భూములను తీసుకున్నట్లయితే, ప్రస్తుత మార్కెట్ విలువకు అనుగుణంగా నష్టపరిహారం అందించాలని వారు డిమాండ్ చేశారు. భూసేకరణ చట్టానికి అనుగుణంగా ప్రక్రియను పూర్తి చేయకుండా భూములను వినియోగించడం సరికాదని పేర్కొన్నారు.

తాండూర్ ఎమ్మెల్యే మనోహర్ రెడ్డి ఈ అంశంపై తక్షణమే జోక్యం చేసుకుని ప్రభుత్వంతో చర్చించి దళిత, పేద రైతులకు భూమికి భూమి లేదా తగిన నష్టపరిహారం అందేలా చర్యలు తీసుకోవాలని రైతులు, ప్రజా సంఘాల నాయకులు కోరారు.

ఈ కార్యక్రమంలో రైతులు వెంకటయ్య, బాలరాజ్, పెద్ద వెంకటయ్య, చంద్రమ్మ, శ్రీనివాస్, రవికుమార్ తదితరులు పాల్గొన్నారు.

— అయుష్ 24 న్యూస్