నల్గొండ వైద్యశాఖలో నకిలీ డెత్ సర్టిఫికెట్ కలకలం!

రిటైర్మెంట్ తర్వాత మృతి చెందిన ఉద్యోగి పేరుతో కారుణ్య నియామకం..!

సూర్యాపేటలో అసలు మరణం.. నల్గొండలో తప్పుడు మరణ ధృవీకరణ పత్రం సృష్టించారనే ఆరోపణలు

అధికారుల పాత్రపై అనుమానాలు.. ముడుపులు చేతులు మారాయా?

అర్హులైన నిరుద్యోగులకు అన్యాయం.. ఉన్నతస్థాయి విచారణకు ప్రజాసంఘాల డిమాండ్

నల్గొండ: నల్గొండ జిల్లా వైద్య ఆరోగ్యశాఖలో కారుణ్య నియామకం పేరుతో జరిగినట్లు ఆరోపణలు ఎదుర్కొంటున్న నకిలీ మరణ ధృవీకరణ పత్రాల వ్యవహారం తీవ్ర కలకలం రేపుతోంది. ఉద్యోగ విరమణ పొందిన ప్రభుత్వ ఉద్యోగి మరణ తేదీని తారుమారు చేసి, ఆయన కుమారుడికి కారుణ్య నియామకం కల్పించారనే ఆరోపణలు వెలుగులోకి వచ్చాయి. ఈ వ్యవహారంలో నకిలీ ధృవీకరణ పత్రం సృష్టించడం నుంచి ఉద్యోగ నియామకం వరకు పలువురు అధికారుల పాత్ర ఉందనే అనుమానాలు వ్యక్తమవుతున్నాయి.

23 ఏళ్ల సేవ.. ఆ తర్వాత పదవీ విరమణ

వివరాల్లోకి వెళితే.. చామకురి వెంకటేశ్వర్లు (61) 2003 మే 29న కాంట్రాక్ట్ హెల్త్ అసిస్టెంట్‌గా విధుల్లో చేరారు. ఫాలి గౌరారం, మాదారం (కాలన్) ప్రాథమిక ఆరోగ్య కేంద్రం పరిధిలోని సబ్ సెంటర్లలో సుమారు 23 ఏళ్లపాటు సేవలందించారు. గత ప్రభుత్వ హయాంలో 2023 మే 26న ఆయన సేవలను క్రమబద్ధీకరించారు. అనంతరం ప్రభుత్వ నిబంధనల ప్రకారం 2025 మే 31న పదవీ విరమణ పొందారు.

సూర్యాపేటలో మరణం.. తేదీ మార్చారనే ఆరోపణలు

కిడ్నీ వ్యాధితో బాధపడుతున్న వెంకటేశ్వర్లు సూర్యాపేటలోని దయాల్ సన్ క్లినిక్‌లో చికిత్స పొందుతూ 2025 నవంబర్ 26న మరణించినట్లు కుటుంబ సభ్యులు, స్థానికంగా ఉన్న ఆధారాలు సూచిస్తున్నాయని ఆరోపణలు వినిపిస్తున్నాయి. ఆయన మరణం సందర్భంగా నిర్వహించిన కార్యక్రమాలకు సంబంధించిన ఫొటోలు, బ్యానర్లు కూడా అందుబాటులో ఉన్నట్లు తెలుస్తోంది.

అయితే, ఆయన మే 31, 2025న పదవీ విరమణ పొందిన తర్వాత నవంబర్‌లో మరణించడంతో సాధారణ నిబంధనల ప్రకారం కారుణ్య నియామకానికి అర్హత ఉండదనే ప్రశ్నలు తలెత్తుతున్నాయి.

మే 28న మరణించినట్లు నకిలీ సర్టిఫికెట్ సృష్టించారా?

ఈ వ్యవహారంలో అత్యంత కీలకమైన ఆరోపణ ఏమిటంటే.. వెంకటేశ్వర్లు వాస్తవంగా నవంబర్ 26, 2025న సూర్యాపేటలో మరణించినప్పటికీ, ఆయన 2025 మే 28నే మరణించినట్లు నల్గొండ జిల్లాలో మరణ ధృవీకరణ పత్రం సృష్టించారనే ఆరోపణలు ఉన్నాయి. ఈ ధృవీకరణ పత్రం ఎలా జారీ అయింది? ఏ రికార్డుల ఆధారంగా నమోదు చేశారు? ఆన్‌లైన్‌లో నమోదైన అసలు మరణ వివరాలను పరిశీలించారా? అనే ప్రశ్నలు ఇప్పుడు చర్చనీయాంశంగా మారాయి.

కుమారుడికి కారుణ్య ఉద్యోగం.. నియామకంపై తీవ్ర అభ్యంతరాలు

ఈ మరణ ధృవీకరణ పత్రం ఆధారంగా వెంకటేశ్వర్లు కుమారుడు చామకురి రాజుకు నల్గొండ జిల్లా దామరచర్ల ప్రాథమిక ఆరోగ్య కేంద్రంలో అటెండర్‌గా కారుణ్య నియామకం కల్పించి విధుల్లోకి తీసుకున్నారనే ఆరోపణలు ఉన్నాయి. వాస్తవ మరణ తేదీ, పదవీ విరమణ తేదీ, నియామకానికి సమర్పించిన పత్రాలను పరిశీలిస్తే ఈ వ్యవహారంలోని అసలు నిజాలు వెలుగులోకి వచ్చే అవకాశం ఉంది.

అధికారుల పాత్రపై ఆరోపణలు.. ముడుపులు చేతులు మారాయా?

ఈ వ్యవహారంలో నల్గొండ జిల్లా వైద్య ఆరోగ్యశాఖ కార్యాలయంలో పనిచేస్తున్న కొందరు అధికారుల పాత్రపై అనుమానాలు వ్యక్తమవుతున్నాయి. ముఖ్యంగా సీసీ పోలె రంజిత్ కుమార్, జిల్లా వైద్య ఆరోగ్యశాఖ కార్యాలయ సూపరింటెండెంట్ పాత్రపై ఆరోపణలు వినిపిస్తున్నాయి. భారీ మొత్తంలో ముడుపులు తీసుకుని నకిలీ పత్రాలకు ఆమోదం తెలిపేలా సహకరించారనే ఆరోపణలు కూడా ఉన్నాయి. అయితే ఈ ఆరోపణలపై అధికారిక విచారణ జరిపి వాస్తవాలను నిర్ధారించాల్సి ఉంది.

ప్రభుత్వం స్పందించాలి.. బాధ్యులపై కఠిన చర్యలు తీసుకోవాలి

ప్రభుత్వ ఉద్యోగి పదవీ విరమణ పొందిన తర్వాత మరణించినా, ఆయన మరణ తేదీని ముందుకు మార్చి కారుణ్య నియామకం పొందినట్లు ఆరోపణలు రావడం అత్యంత తీవ్రమైన విషయం. ఈ వ్యవహారం నిజమని తేలితే ప్రభుత్వ రికార్డుల విశ్వసనీయతకే సవాలుగా మారుతుంది. అర్హులైన నిరుద్యోగులకు దక్కాల్సిన అవకాశాలను అక్రమ మార్గంలో పొందడం ఎంతమాత్రం సమర్థనీయం కాదు.

కాబట్టి రాష్ట్ర వైద్య ఆరోగ్యశాఖ ఉన్నతాధికారులు ఈ వ్యవహారాన్ని తక్షణమే సుమోటోగా స్వీకరించి సమగ్ర విచారణ చేపట్టాలి. అసలు మరణ ధృవీకరణ పత్రం, ఆన్‌లైన్ రికార్డులు, ఆసుపత్రి వైద్య రికార్డులు, కారుణ్య నియామక ఫైల్, ఆమోదించిన అధికారుల వివరాలను క్షుణ్ణంగా పరిశీలించాలి. అక్రమాలు జరిగినట్లు నిర్ధారణ అయితే సంబంధిత అధికారులతో పాటు బాధ్యులందరిపై క్రిమినల్ కేసులు నమోదు చేసి, నిబంధనల ప్రకారం కఠిన చర్యలు తీసుకోవాలని ప్రజాసంఘాలు డిమాండ్ చేస్తున్నాయి.

అవినీతిపై విచారణ జరిపించడానికి ప్రభుత్వం ఇంకా ఎందుకు వెనుకడుగు వేస్తోంది? అర్హులైన నిరుద్యోగులకు న్యాయం చేయడానికి ఉన్నతాధికారులు స్పందించేది ఎప్పుడు? ఈ ఆరోపణలపై ప్రభుత్వం మౌనం వీడి నిజానిజాలను ప్రజల ముందు ఉంచాల్సిన అవసరం ఎంతైనా ఉంది.

Mohammad Abdul HadiAY24-R-0010· 31 Oct 2026 · 04:08