ఆయుష్ 24 న్యూస్ ప్రతినిధి | పెద్దపల్లి జిల్లా, అక్టోబర్ 11
పెద్దపల్లి జిల్లా ధర్మారం మండల కేంద్రానికి చెందిన గంగాధర లక్ష్మి అనే మహిళ అనుమానాస్పద స్థితిలో మృతి చెందడం కలకలం రేపింది. శనివారం ఉదయం ఆమె మరణించగా, అదే రోజు రాత్రి కుటుంబ సభ్యులు అంత్యక్రియలు నిర్వహించారు. అయితే ఆమె మృతిపై అనుమానాలు వ్యక్తం చేస్తూ స్థానికులు పోలీసుల దృష్టికి తీసుకెళ్లడంతో అధికారులు విచారణ చేపట్టారు.
కుటుంబ కలహాల నేపథ్యంలో అనుమానాలు
మృతురాలు లక్ష్మి కుటుంబంలో గతంలో అత్త, కోడళ్ల మధ్య తరచూ గొడవలు జరిగేవని, ఈ వ్యవహారం గతంలో పోలీస్‌స్టేషన్‌ వరకు వెళ్లినట్లు సమాచారం. ఈ నేపథ్యంలో లక్ష్మి మృతిపై అనుమానాలు వ్యక్తం చేస్తూ అదే కాలనీకి చెందిన ఆమె దగ్గరి బంధువు సింగిరెడ్డి సరోజన పోలీసులకు ఫిర్యాదు చేశారు. ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు.
తహసీల్దార్ సమక్షంలో పోస్టుమార్టం
ఈ ఘటనపై ధర్మారం సీఐ ప్రవీణ్ కుమార్ తెలిపిన వివరాల ప్రకారం.. లక్ష్మి మృతదేహానికి శనివారం రాత్రి సుమారు 7 గంటల సమయంలో కుటుంబ సభ్యులు అంత్యక్రియలు నిర్వహించారు. అయితే అనుమానాస్పద మృతిపై ఫిర్యాదు అందడంతో ఆదివారం మృతదేహాన్ని వెలికితీసి, తహసీల్దార్ డి. శ్రీనివాస్, అసిస్టెంట్ ప్రొఫెసర్ డాక్టర్ కార్తీక్ సమక్షంలో పోస్టుమార్టం నిర్వహించినట్లు తెలిపారు.
పోస్టుమార్టం నివేదిక తర్వాత పూర్తి వివరాలు
పోస్టుమార్టం నివేదిక అందిన తర్వాత లక్ష్మి మృతికి సంబంధించిన పూర్తి వివరాలు వెల్లడిస్తామని సీఐ ప్రవీణ్ కుమార్ తెలిపారు. ప్రస్తుతం ఈ ఘటనపై పోలీసులు దర్యాప్తు కొనసాగిస్తున్నారు. పోస్టుమార్టం నివేదిక వెలువడిన తర్వాతే మరణానికి గల కారణాలపై స్పష్టత వచ్చే అవకాశం ఉంది.
— ఆయుష్ 24 న్యూస్
The Voice of Truth

Mahamood MohammedAY24-R-0008· 11 Oct 2026 · 12:01