తొలగించాలని కోరుతున్న కాలనీవాసులు — చర్యలు చేపడతామని శానిటరీ ఇన్‌స్పెక్టర్ శంకర్ గౌడ్

దేవరకొండ, సెప్టెంబర్ 30, 2026, AYUSH24 NEWS ప్రతినిధి:

దేవరకొండ పట్టణంలోని 15వ వార్డు ఉర్దూ మీడియం ఉన్నత పాఠశాల ఎదురుగా రోడ్డుపై వర్షపు నీరు, మురుగు నీరు నిలిచి దుర్గంధభరితంగా మారుతోందని పాఠశాల ఉపాధ్యాయులు, కాలనీవాసులు ఆవేదన వ్యక్తం చేస్తున్నారు. విద్యార్థులు ప్రతిరోజూ మురికి నీటిని దాటుకుంటూ పాఠశాలకు వెళ్లాల్సి వస్తోందని, ఉపాధ్యాయులతో పాటు ఇదే మార్గంలో రాకపోకలు సాగించే వందలాది మంది ఇబ్బందులు ఎదుర్కొంటున్నారని పేర్కొన్నారు.

వర్షం కురిసిన సమయంలో నీరు ఓపెన్ డ్రైనేజీల్లోకి వెళ్లేందుకు సరైన మార్గం లేకపోవడంతో రోడ్డుపైనే నిలిచి బురదగా మారుతోందని కాలనీవాసులు తెలిపారు. నిల్వ నీటితో దోమలు పెరిగి మలేరియా, డెంగ్యూ వంటి జ్వరాల ముప్పు ఏర్పడే అవకాశం ఉందని వారు ఆందోళన వ్యక్తం చేశారు.

సమస్యపై పలుమార్లు మున్సిపల్ అధికారులకు విజ్ఞప్తి చేసినప్పటికీ నీటిని తొలగించేందుకు ప్రత్యామ్నాయ మార్గం, శాశ్వత పరిష్కారం కోసం చర్యలు చేపట్టడం లేదని కాలనీవాసులు ఆరోపించారు. దీంతో సమస్య రోజురోజుకూ జటిలంగా మారుతోందని పేర్కొన్నారు.

పట్టణ మున్సిపల్ వైస్ చైర్‌పర్సన్ ఇదే వార్డుకు కౌన్సిలర్‌గా ఎన్నికయ్యారని, పాఠశాలకు సమీపంలోనే సమస్య ఉన్నప్పటికీ పరిష్కార చర్యలు చేపట్టడం లేదనే విమర్శలు స్థానికుల నుంచి వ్యక్తమవుతున్నాయి. ప్రజల ఆరోగ్య పరిరక్షణతో పాటు మౌలిక సదుపాయాల కల్పనపై ప్రజాప్రతినిధులు, అధికారులు ప్రత్యేక దృష్టి సారించాలని కోరుతున్నారు.

ప్రజలు సమస్యలను అధికారుల దృష్టికి తీసుకెళ్లినప్పుడు పరిష్కారంలో జాప్యం జరుగుతోందని పలువురు విమర్శిస్తున్నారు. ఇప్పటికైనా మున్సిపల్ అధికారులు స్పందించి పాఠశాల రోడ్డుపై నిలుస్తున్న నీటిని తొలగించడంతో పాటు సమస్యకు శాశ్వత పరిష్కారం చూపాలని వార్డు ప్రజలు కోరుతున్నారు.

సమస్య పరిష్కారానికి చర్యలు చేపడతాం: శానిటరీ ఇన్‌స్పెక్టర్ శంకర్ గౌడ్

ఉర్దూ మీడియం పాఠశాల వద్ద వర్షపు నీరు నిలిచి దుర్గంధభరితంగా మారుతోందనే ఫిర్యాదు తనకు అందిందని శానిటరీ ఇన్‌స్పెక్టర్ శంకర్ గౌడ్ తెలిపారు. సమస్యను పరిష్కరించేందుకు చర్యలు చేపడతామని పేర్కొన్నారు.

Musini.AnjanAY24-R-0011· 30 Sep 2026 · 16:35