దేవరకొండ మాజీ ఎమ్మెల్యే రమావత్ రవీంద్ర కుమార్
కొండమల్లెపల్లి, అక్టోబర్ 18 (ఆయుష్ 24 న్యూస్):
క్రీడలు శారీరక దృఢత్వంతో పాటు మానసిక ఉల్లాసాన్ని అందిస్తాయని దేవరకొండ మాజీ శాసనసభ్యులు రమావత్ రవీంద్ర కుమార్ అన్నారు. కొండమల్లెపల్లి మండలం అంబోతు తండాలో నిర్వహించిన క్రికెట్ పోటీల్లో విజయం సాధించిన క్రీడాకారులకు ఆయన బహుమతులు అందజేశారు.
ఈ సందర్భంగా రమావత్ రవీంద్ర కుమార్ మాట్లాడుతూ.. గ్రామీణ ప్రాంతాల యువతలో అపారమైన క్రీడా ప్రతిభ దాగి ఉందని, ఇలాంటి టోర్నమెంట్లు యువతలోని ప్రతిభను వెలికితీసేందుకు ఎంతగానో దోహదపడతాయని పేర్కొన్నారు. యువత క్రీడల్లో చురుగ్గా పాల్గొంటూ, తమ ప్రతిభను మెరుగుపరుచుకుని ఉన్నత స్థాయికి ఎదగాలని ఆకాంక్షించారు.
క్రీడలు యువతలో క్రమశిక్షణ, పట్టుదల, సమయపాలనతో పాటు ఐక్యతా భావాన్ని పెంపొందిస్తాయని ఆయన అన్నారు. గెలుపోటములను సమానంగా స్వీకరిస్తూ, క్రీడాస్ఫూర్తితో ముందుకు సాగాలని యువతకు సూచించారు. క్రీడల్లో ప్రతిభ కనబరిచి తమ గ్రామానికి, ప్రాంతానికి మంచి పేరు తీసుకురావాలని పిలుపునిచ్చారు.
గ్రామీణ ప్రాంతాల్లో క్రీడలను ప్రోత్సహిస్తూ యువతకు అవకాశాలు కల్పించేందుకు నిర్వాహకులు చేస్తున్న కృషిని రవీంద్ర కుమార్ అభినందించారు. యువత తమలోని ప్రతిభను గుర్తించి, నిరంతర సాధనతో లక్ష్యాలను చేరుకోవాలని సూచించారు.
ఈ కార్యక్రమంలో బీఆర్‌ఎస్ మండల అధ్యక్షులు రమావత్ దాస్రు నాయక్, కేసాని లింగారెడ్డి, సర్పంచులు రమావత్ తులసీరామ్, కావటి వెంకటేష్, మాజీ సర్పంచ్ రమావత్ శ్రీను నాయక్, దేవేందర్ నాయక్, పంది హరికృష్ణ తదితరులు పాల్గొన్నారు.
— ఆయుష్ 24 న్యూస్

Mahamood MohammedAY24-R-0008· 19 Oct 2026 · 03:39

📷 ఈ వార్తకు సంబంధించిన ఫోటోలు