— మునగాల కొండలరావు ప్రభుత్వ డిగ్రీ కళాశాలలో గోల్డ్ మెడల్ కార్యదర్శి సముద్రాల ధనంజయ్ ఉదారత

— బీఏ తృతీయ సంవత్సరం విద్యార్థిని షాహిదాకు రూ.10,000 అందజేత

దేవరకొండ,04 నవంబర్ ( AYUSH24 NEWS ప్రతినిధి ):

మానవత్వం, సేవాభావం, విద్య పట్ల ఉన్న నిబద్ధతకు నిదర్శనంగా మునగాల కొండలరావు ప్రభుత్వ డిగ్రీ కళాశాల (అటానమస్), దేవరకొండలో గోల్డ్ మెడల్ కార్యదర్శి శ్రీ సముద్రాల ధనంజయ్ గారు తన గొప్ప మనసును చాటుకున్నారు.

తన తల్లిదండ్రులైన స్వర్గీయ శ్రీమతి సముద్రాల మణెమ్మ, స్వర్గీయ సముద్రాల మారయ్య గార్ల జ్ఞాపకార్థం, కళాశాలలో తల్లిదండ్రులు లేని బి.ఏ. తృతీయ సంవత్సరం చదువుతున్న విద్యార్థిని షాహిదా భవిష్యత్తు విద్యాభ్యాసానికి చేయూతనందించాలనే సదుద్దేశంతో రూ.10,000/- (పది వేల రూపాయలు) ఆర్థిక సహాయాన్ని కళాశాల మహిళా సాధికారిక విభాగం ఆధ్వర్యంలో విరాళంగా అందించారు.

ఈ సందర్భంగా సముద్రాల ధనంజయ్ మాట్లాడుతూ, తల్లిదండ్రులను కోల్పోయినప్పటికీ విద్యపై ఆశయంతో ముందుకు సాగుతున్న షాహిదాకు తన వంతు సహాయం అందించడం ఎంతో సంతోషంగా ఉందని తెలిపారు. ఈ ఆర్థిక సహాయం ఆమె ఉన్నత విద్యాభ్యాసానికి కొంతైనా తోడ్పడుతుందని, ఆమె ఉన్నత విద్యను కొనసాగించి భవిష్యత్తులో ఉన్నత స్థాయికి ఎదగాలని ఆకాంక్షించారు. తన తల్లిదండ్రుల జ్ఞాపకార్థం విద్యార్థినికి సహాయం అందించడం ద్వారా వారి ఆశయాలను గౌరవించుకున్నానని పేర్కొన్నారు.

ఈ సందర్భంగా కళాశాల ప్రిన్సిపాల్ ప్రొఫెసర్ రామావత్ రవి మాట్లాడుతూ, విద్యార్థులకు విద్యాబోధన చేయడం అధ్యాపకుల బాధ్యత అయితే, ఆర్థికంగా వెనుకబడిన విద్యార్థుల విద్యాభ్యాసానికి సమాజం నుంచి సహకారం అందించడం ఎంతో అభినందనీయమైన విషయం అని అన్నారు. తల్లిదండ్రులను కోల్పోయిన విద్యార్థిని షాహిదా భవిష్యత్తును దృష్టిలో ఉంచుకుని సముద్రాల ధనంజయ్ గారు అందించిన ఈ ఆర్థిక సహాయం ఆమెకు ఎంతో ప్రోత్సాహాన్నిస్తుందని పేర్కొన్నారు.

తల్లిదండ్రుల జ్ఞాపకార్థం ఒక విద్యార్థిని భవిష్యత్తుకు బాటలు వేయాలనే ఆలోచన నిజంగా ఆదర్శప్రాయమని, ఇటువంటి సేవా కార్యక్రమాలు సమాజంలో మరింతమందికి స్ఫూర్తినిస్తాయని అన్నారు. విద్యార్థులు ఎదుర్కొంటున్న ఆర్థిక ఇబ్బందులను గుర్తించి వారికి అండగా నిలబడే దాతల సహకారం విద్యాసంస్థల అభివృద్ధికి, విద్యార్థుల భవిష్యత్తుకు ఎంతో దోహదపడుతుందని తెలిపారు. షాహిదా ఈ అవకాశాన్ని సద్వినియోగం చేసుకుని ఉన్నత విద్యను అభ్యసించి జీవితంలో మంచి స్థాయికి చేరుకోవాలని ఆకాంక్షించారు.

తల్లిదండ్రుల జ్ఞాపకాలను ఒక విద్యార్థిని భవిష్యత్తుకు వెలుగులుగా మార్చిన సముద్రాల ధనంజయ్ గారి సేవాభావం అందరికీ ఆదర్శనీయం. ఈ ఉదార సహకారంపై కళాశాల యాజమాన్యం, అధ్యాపక బృందం ఆయనకు ప్రత్యేక కృతజ్ఞతలు తెలియజేసింది. ఈ కార్యక్రమంలో కళాశాల వైస్ ప్రిన్సిపల్ జి. కోటయ్య, మహిళా సాధికారిత విభాగం కోఆర్డినేటర్ డాక్టర్ కె.రేణుక, అకాడమీ కోఆర్డినేటర్ సిహెచ్. లింగమయ్య, ఐ క్యు ఏసి కోఆర్డినేటర్ డాక్టర్ కె. పృథు, డాక్టర్ వి.మకట్లాల్ డాక్టర్ ఎం .ప్రభాకర్, ఎస్.సురేష్, అమర్,మధు,జగతి ,భరణి తదితర కళాశాల సిబ్బంది పాల్గొన్నారు.

Govardhan PulijalaAY24-R-0004· 04 Nov 2026 · 14:07