హైదరాబాద్: సింగరేణి బొగ్గు ఉత్పత్తి, టెండర్ల ప్రక్రియ, ప్రైవేటీకరణ అంశాలపై బీఆర్ఎస్ వర్కింగ్ ప్రెసిడెంట్ కేటీఆర్, ఇతర నాయకులు చేస్తున్న ఆరోపణలను రాష్ట్ర ఐటీ, పరిశ్రమలు, శాసనసభ వ్యవహారాల శాఖ మంత్రి దుద్దిళ్ల శ్రీధర్‌బాబు ఖండించారు. గురువారం హైదరాబాద్‌లోని సీఎల్పీ కార్యాలయంలో నిర్వహించిన మీడియా సమావేశంలో ఆయన మాట్లాడుతూ.. గత పదేళ్ల బీఆర్ఎస్ పాలనలో సింగరేణికి కొత్త బొగ్గు గనులు దక్కకుండా పోవడం, విద్యుత్ సంస్థల నుంచి బకాయిలు పేరుకుపోవడం వంటి అంశాల వల్ల సంస్థ ఇబ్బందులు ఎదుర్కొందని ఆరోపించారు. ప్రస్తుతం ప్రజా ప్రభుత్వం సింగరేణిని ఆర్థికంగా బలోపేతం చేస్తూ, కొత్త గనుల సాధనకు చర్యలు తీసుకుంటోందని వెల్లడించారు.
జీ-9 బొగ్గు సరఫరాపై మంత్రి వివరణ
సింగరేణిలో ప్రస్తుతం తొమ్మిది గనుల నుంచి జీ-9 గ్రేడ్ బొగ్గు ఉత్పత్తి అవుతోందని మంత్రి తెలిపారు. గత పదేళ్లలో ఇంధన సరఫరా ఒప్పందాలు ఉన్న థర్మల్ విద్యుత్ కేంద్రాలకు ఏటా సగటున సుమారు 40 లక్షల టన్నుల జీ-9 బొగ్గు సరఫరా చేసినట్లు వివరించారు.
ఈ ఏడాది ఇప్పటివరకు తెలంగాణతో పాటు ఇతర రాష్ట్రాల్లోని థర్మల్ విద్యుత్ కేంద్రాలకు సింగరేణి 2.5 కోట్ల టన్నులకు పైగా బొగ్గు సరఫరా చేసిందని తెలిపారు. ఇందులో జీ-9 గ్రేడ్ బొగ్గు 12 లక్షల టన్నులు మాత్రమేనని, అందులోనూ 5.2 లక్షల టన్నులు తెలంగాణ జెన్‌కో విద్యుత్ కేంద్రాలకు సరఫరా చేసినట్లు పేర్కొన్నారు.
యాదాద్రి థర్మల్ విద్యుత్ కేంద్రానికి ఏటా 1.4 కోట్ల టన్నుల జీ-9 బొగ్గు సరఫరా చేసేలా గత బీఆర్ఎస్ ప్రభుత్వ హయాంలోనే ఒప్పందం జరిగిందని శ్రీధర్‌బాబు గుర్తుచేశారు. భవిష్యత్తులో సింగరేణి చేపట్టే కొత్త గనుల నుంచి పెరిగే ఉత్పత్తిని దృష్టిలో పెట్టుకొని ఈ ఒప్పందం చేసుకున్నారని వివరించారు.
కొత్త గనులు దక్కకపోవడంతో ఉత్పత్తి సామర్థ్యంపై ప్రభావం
సింగరేణి ఉత్పత్తి సామర్థ్యం తగ్గడానికి గత ప్రభుత్వ నిర్ణయాలు కూడా కారణమని మంత్రి ఆరోపించారు. కేంద్ర ప్రభుత్వం నిర్వహించిన బొగ్గు గనుల వేలంలో సింగరేణి పాల్గొనకపోవడంతో కోయగూడెం-3, సత్తుపల్లి-3 బ్లాకులు సంస్థకు దక్కలేదన్నారు. దీంతో ఏటా సుమారు కోటి టన్నుల నాణ్యమైన బొగ్గు ఉత్పత్తి చేసే అవకాశాన్ని కోల్పోయిందని పేర్కొన్నారు.
దాదాపు 14 గనులు మూతపడటం వల్ల మరో 1.5 కోట్ల టన్నుల ఉత్పత్తి సామర్థ్యంపై ప్రభావం పడిందని తెలిపారు.
ప్రస్తుత ప్రభుత్వం రెండేళ్లలోనే నైనీ బొగ్గు గనికి అవసరమైన అనుమతులు సాధించి ఉత్పత్తిని ప్రారంభించిందని మంత్రి వెల్లడించారు. 2013లో యూపీఏ ప్రభుత్వం మంజూరు చేసిన తాడిచెర్ల బ్లాక్-2కు మైనింగ్ అనుమతులు తీసుకొచ్చామని, వేలం ద్వారా మణుగూరు పీకే ఓసీ-2 డిప్‌సైడ్ బ్లాక్‌ను సింగరేణికి దక్కించామని వివరించారు. ఈ గనుల ద్వారా రానున్న రోజుల్లో సంస్థ ఉత్పత్తి సామర్థ్యం పెరుగుతుందని ఆశాభావం వ్యక్తం చేశారు.
బొగ్గు అక్రమ రవాణాను అడ్డుకునేందుకు పటిష్ట నిఘా
137 ఏళ్ల సుదీర్ఘ మైనింగ్ అనుభవం కలిగిన సింగరేణిలో బొగ్గు ఉత్పత్తి నుంచి తుది పంపిణీ వరకు ప్రతి దశను పర్యవేక్షించే సాంకేతిక వ్యవస్థ అమల్లో ఉందని శ్రీధర్‌బాబు తెలిపారు.
SAP/ERP అనుసంధానం, GPS/GPRS ద్వారా వాహనాల ట్రాకింగ్, జియోఫెన్సింగ్, ఎలక్ట్రానిక్ తూకం, ఆకస్మిక తనిఖీలు, బూమ్ బారియర్లు, బొగ్గు నిల్వల పరిశీలన, బొగ్గు చోరీ నిరోధక బృందాలు, విజిలెన్స్ చర్యల ద్వారా అక్రమాలను అరికట్టేందుకు చర్యలు తీసుకుంటున్నట్లు చెప్పారు.
ప్రతి టన్ను బొగ్గుకు లెక్క ఉండేలా వ్యవస్థ పనిచేస్తోందని, బొగ్గు అక్రమాలపై ఆరోపణలు చేసేవారు ఆధారాలను బయటపెట్టాలని డిమాండ్ చేశారు. ఎలాంటి ఆధారాలు లేకుండా సింగరేణి కార్మికులు, అధికారుల నిజాయితీపై ఆరోపణలు చేయడం సరికాదన్నారు.
సైట్ విజిట్ నిబంధనతో పారదర్శకత
సింగరేణి టెండర్లలో ప్రవేశపెట్టిన సైట్ విజిట్ సర్టిఫికెట్ నిబంధనపై మంత్రి వివరణ ఇచ్చారు. కాంట్రాక్టర్లు తాము చేపట్టబోయే పనుల ప్రాంతాన్ని ముందుగానే పరిశీలించి, అక్కడి భౌగోళిక పరిస్థితులు, స్థానిక సామాజిక అంశాలు, మౌలిక సదుపాయాలపై అవగాహన పెంచుకోవడమే ఈ నిబంధన ఉద్దేశమని తెలిపారు.
గతంలో కొందరు కాంట్రాక్టర్లు క్షేత్రస్థాయిలో పరిస్థితులను పరిశీలించకుండానే టెండర్లు దాఖలు చేసి, పనులు ప్రారంభించిన తర్వాత ఇబ్బందులు ఎదుర్కొని మధ్యలోనే పనులు నిలిపివేసేవారని పేర్కొన్నారు. దీంతో సింగరేణికి నష్టం వాటిల్లేదని వివరించారు.
ఈ నిబంధన సింగరేణికి మాత్రమే పరిమితం కాలేదని, జీఎండీసీ, జీఐపీసీఎల్, ఎన్ఎండీసీతో పాటు కొన్ని సోలార్ ప్రాజెక్టులు, ఈపీసీ కాంట్రాక్టుల్లోనూ అమలవుతోందని చెప్పారు. సింగరేణిలో సైతం 2018, 2021, 2023 సంవత్సరాల్లో సీహెచ్‌పీల నిర్మాణానికి పిలిచిన టెండర్లలో సైట్ విజిట్ నిబంధనను పొందుపరిచారని గుర్తుచేశారు.
గతంలో సరైనదిగా ఉన్న నిబంధన ఇప్పుడు తప్పుగా ఎలా మారుతుందని ప్రశ్నించిన మంత్రి.. ఈ అంశంపై బీఆర్ఎస్ నాయకులు చేస్తున్న విమర్శలు రాజకీయ ప్రేరేపితమని ఆరోపించారు.
సింగరేణి ప్రైవేటీకరణకు తావులేదు
సింగరేణి కేంద్ర, రాష్ట్ర ప్రభుత్వాల ఉమ్మడి సంస్థ అని, ఇందులో తెలంగాణ ప్రభుత్వానికి 51 శాతం, కేంద్ర ప్రభుత్వానికి 49 శాతం వాటా ఉందని శ్రీధర్‌బాబు తెలిపారు. సంస్థను మరింత బలోపేతం చేసి అభివృద్ధి పథంలో ముందుకు తీసుకెళ్లడమే ప్రజా ప్రభుత్వ లక్ష్యమన్నారు.
గత బీఆర్ఎస్ ప్రభుత్వం బొగ్గు గనుల వేలంలో సింగరేణి పాల్గొనకుండా చేయడం వల్ల సంస్థకు కొత్త బ్లాకులు దక్కలేదని ఆరోపించారు. ప్రస్తుత ప్రభుత్వం కొత్త గనులను సాధించడంతో పాటు భవిష్యత్తులో మరిన్ని బొగ్గు గనులను సంస్థకు తీసుకొచ్చేందుకు కృషి చేస్తోందని వెల్లడించారు.
బొగ్గు ఉత్పత్తితో పాటు కీలక ఖనిజాలు, థర్మల్ విద్యుత్, సౌర విద్యుత్ రంగాల్లోనూ సింగరేణి కార్యకలాపాలను విస్తరించేలా కార్యాచరణ రూపొందిస్తున్నట్లు తెలిపారు.
సింగరేణి తెలంగాణ ప్రజల గుండెకాయ అని, సంస్థను ప్రైవేట్ వ్యక్తులకు అప్పగించే ప్రసక్తే లేదని మంత్రి స్పష్టం చేశారు.
బకాయిలు, ఆర్థిక పరిస్థితిపై బీఆర్ఎస్‌పై విమర్శలు
గత పదేళ్ల బీఆర్ఎస్ పాలనలో విద్యుత్ సంస్థల పేరుతో సింగరేణికి రావాల్సిన వేల కోట్ల రూపాయల బకాయిలు పేరుకుపోయాయని శ్రీధర్‌బాబు ఆరోపించారు. దీంతో సంస్థ ఆర్థిక పరిస్థితిపై ప్రతికూల ప్రభావం పడిందని పేర్కొన్నారు.
ప్రస్తుత ప్రభుత్వం సింగరేణిలో ఆర్థిక క్రమశిక్షణను తీసుకొస్తూ, టెండర్ల ప్రక్రియలో పారదర్శకతను పెంచుతోందని తెలిపారు. గతంలో టెండర్లలో అక్రమాలు, కమీషన్ల వ్యవహారాలు జరిగాయని ఆరోపించిన ఆయన, ప్రస్తుతం జరుగుతున్న అక్రమాలపై బీఆర్ఎస్ నాయకుల వద్ద ఆధారాలుంటే వాటిని బహిర్గతం చేయాలని సవాల్ విసిరారు.
గత ప్రభుత్వ హయాంలో జరిగినట్లు తాము ఆరోపిస్తున్న అక్రమాల నుంచి ప్రజల దృష్టిని మళ్లించేందుకే ప్రస్తుతం తమ ప్రభుత్వంపై విమర్శలు చేస్తున్నారని మంత్రి పేర్కొన్నారు. కాళేశ్వరం, మిషన్ భగీరథ ప్రాజెక్టులపై కూడా బీఆర్ఎస్ నాయకులను లక్ష్యంగా చేసుకుని విమర్శలు చేశారు.
కార్మికుల సంక్షేమమే ప్రభుత్వ ప్రాధాన్యం
సింగరేణి కార్మికుల సంక్షేమానికి తమ ప్రభుత్వం ప్రాధాన్యం ఇస్తుందని శ్రీధర్‌బాబు తెలిపారు. లాభాల వాటా విషయంలో కార్మికులకు పూర్తి న్యాయం చేస్తామని హామీ ఇచ్చారు.
గనుల భద్రత, పర్యావరణ సమతుల్యతకు ప్రాధాన్యం ఇస్తూనే బొగ్గు ఉత్పత్తిని క్రమంగా పెంచేందుకు చర్యలు తీసుకుంటున్నామని వివరించారు. గనుల నిర్వహణలో భద్రతా ప్రమాణాలను విస్మరించకుండా ఉత్పత్తిని పెంచడమే తమ లక్ష్యమన్నారు.
యాదాద్రి థర్మల్ విద్యుత్ కేంద్ర నిర్మాణంలో గతంలో సాంకేతిక లోపాలు చోటుచేసుకున్నాయని ఆరోపించిన మంత్రి.. వాటిని సరిదిద్దుతూ విద్యుత్ ఉత్పత్తికి ఆటంకాలు లేకుండా చర్యలు తీసుకుంటున్నామని తెలిపారు.
రాష్ట్రంలో విద్యుత్ కొరత తలెత్తకుండా, భవిష్యత్తు అవసరాలకు అనుగుణంగా బొగ్గు ఉత్పత్తి, విద్యుత్ ఉత్పత్తి రంగాల్లో ప్రణాళికాబద్ధంగా ముందుకు సాగుతున్నామని స్పష్టం చేశారు.
సింగరేణి సంపదను పెంచడం, ఆ సంపదను ప్రజలకు అందించడం ప్రజా ప్రభుత్వ లక్ష్యమని మంత్రి దుద్దిళ్ల శ్రీధర్‌బాబు పేర్కొన్నారు.
ఈ మీడియా సమావేశంలో నకిరేకల్ ఎమ్మెల్యే, ప్రభుత్వ విప్ వేముల వీరేశం, రామగుండం ఎమ్మెల్యే రాజ్ ఠాకూర్ మక్కన్ సింగ్ పాల్గొన్నారు.
— ఆయుష్ 24 న్యూస్

Mahamood MohammedAY24-R-0008· 15 Oct 2026 · 14:54