హైదరాబాద్ | అక్టోబర్ 13, 2026
సింగరేణి మారుపేర్లు, విజిలెన్స్ పెండింగ్ కేసులతో ఏళ్ల తరబడి ఉద్యోగాల కోసం ఎదురుచూస్తున్న కార్మికుల పిల్లలకు త్వరలో న్యాయం జరిగే అవకాశాలు కనిపిస్తున్నాయి. ఈ సమస్యల పరిష్కారంపై డిప్యూటీ సీఎం భట్టి విక్రమార్క కీలక హామీ ఇచ్చినట్లు వెల్లడైంది.
హైదరాబాద్‌లో సింగరేణి లాభాల వాటా సమావేశం సందర్భంగా సచివాలయంలో నిర్వహించిన మీడియా సమావేశంలో ఈ అంశంపై ప్రభుత్వం తీసుకుంటున్న చర్యలను వివరించినట్లు తెలిపారు. బాధిత కుటుంబాల పరిస్థితిని మానవీయ కోణంలో పరిశీలించి, అర్హులకు ఉద్యోగాలు కల్పించే అంశంపై సింగరేణి యాజమాన్యంతో చర్చించినట్లు పేర్కొన్నారు.
ఈ మేరకు 15 రోజుల్లో సింగరేణి యాజమాన్యం నుంచి నివేదిక తెప్పించి, ఉద్యోగాల కల్పనకు చర్యలు తీసుకుంటామని హామీ ఇచ్చినట్లు సమాచారం.
ఈ సమస్యను ప్రభుత్వం దృష్టికి తీసుకెళ్లడంలో రామగుండం ఎమ్మెల్యే మక్కన్ సింగ్ రాజ్ ఠాకూర్, పెద్దపల్లి ఎమ్మెల్యే విజయరమణారావు, మంచిర్యాల ఎమ్మెల్యే ప్రేమ్‌సాగర్ రావు, మంత్రి దుద్దిళ్ల శ్రీధర్ బాబు, మంత్రి వివేక్ వెంకటస్వామి తదితరులు కృషి చేశారు. అలాగే INTUC జనరల్ సెక్రటరీ డాక్టర్ జనక్ ప్రసాద్ కూడా బాధిత కుటుంబాల సమస్యల పరిష్కారం కోసం పలుమార్లు ప్రభుత్వానికి విజ్ఞప్తి చేశారు. ఏళ్ల తరబడి ఉద్యోగాల కోసం ఎదురుచూస్తున్న సింగరేణి కార్మికుల పిల్లల్లో ఈ హామీ కొత్త ఆశలు నింపింది. పెండింగ్‌లో ఉన్న మారుపేర్లు, విజిలెన్స్ కేసుల సమస్యలకు పరిష్కారం లభిస్తుందని బాధిత కుటుంబాలు ఆశాభావం వ్యక్తం చేస్తున్నాయి.
అయితే, 15 రోజుల్లో నివేదిక సమర్పణతో పాటు ఉద్యోగాల కల్పనకు సంబంధించి ప్రభుత్వం, సింగరేణి యాజమాన్యం తీసుకునే తదుపరి నిర్ణయాలపై బాధిత కుటుంబాలు ఎదురుచూస్తున్నాయి.
Ayush 24 News – సింగరేణి కార్మికుల సమస్యలే మా ప్రాధాన్యం!

Mahamood MohammedAY24-R-0008· 13 Oct 2026 · 14:00