మిర్యాలగూడ, సెప్టెంబర్ 15 (అయుష్ 24 న్యూస్):
మిర్యాలగూడ పట్టణంలోని స్థానిక హౌసింగ్ బోర్డులోని సుమన్ షోటోకాన్ కరాటే అకాడమీ ఆఫ్ ఇండియా ఆధ్వర్యంలో భారతరత్న అవార్డు గ్రహీత, ప్రముఖ ఇంజనీర్ మోక్షగుండం విశ్వేశ్వరయ్య జయంతిని ఘనంగా నిర్వహించారు. సెప్టెంబర్ 15ను దేశవ్యాప్తంగా ఇంజినీర్స్ డేగా నిర్వహిస్తున్న సందర్భంగా విద్యార్థులకు ఆయన జీవితం, సేవలు, స్ఫూర్తి గురించి అవగాహన కల్పించారు.

ఈ సందర్భంగా అకాడమీ జాతీయ అధ్యక్షులు మాస్టర్ బూడిద సైదులు మాట్లాడుతూ.. కరాటే శిక్షణతో పాటు విద్యార్థుల్లో విద్య, క్రమశిక్షణ, ప్రతిభను పెంపొందించడం తమ అకాడమీ ప్రధాన లక్ష్యమని అన్నారు. విద్యార్థులు క్రీడలతో పాటు చదువులోనూ రాణించి ఉన్నత స్థాయికి ఎదగాలని ఆకాంక్షించారు.

BSNL శ్రీనివాస్ మాట్లాడుతూ.. సమాజంలో ప్రతి ఒక్క విద్యార్థి మంచి విద్యను అభ్యసించి ఇంజినీర్లు, ఇతర ఉన్నత స్థాయి నిపుణులుగా ఎదగాలని అన్నారు. భారతరత్న మోక్షగుండం విశ్వేశ్వరయ్య జయంతిని కరాటే అకాడమీలో నిర్వహించడం ఆనందంగా ఉందని తెలిపారు. విశ్వేశ్వరయ్య జీవితం నేటి విద్యార్థులకు ఎంతో స్ఫూర్తిదాయకమని పేర్కొన్నారు.

సీనియర్ కరాటే మాస్టర్ బాండవత్ రామకృష్ణ నాయక్ మాట్లాడుతూ.. మోక్షగుండం విశ్వేశ్వరయ్య జీవితం, ఇంజినీరింగ్ రంగానికి ఆయన చేసిన సేవలపై విద్యార్థులకు అవగాహన కల్పించేందుకు కార్యక్రమాన్ని నిర్వహించినట్లు తెలిపారు. ఈ సందర్భంగా సుమారు 100 మంది విద్యార్థులు ఇంజినీరింగ్ డే అంశంపై నిర్వహించిన పరీక్షలో పాల్గొన్నారని చెప్పారు.

పరీక్షలో ప్రతిభ కనబరిచిన విద్యార్థులకు బహుమతులు అందజేశారు. మొదటి బహుమతిగా శివ ప్రసాద్‌కు రూ.500, రెండో బహుమతిగా అనన్య పరిదాకు రూ.500 అందించారు.

🇮🇳 విశ్వేశ్వరయ్యకు ఘన నివాళి

మోక్షగుండం విశ్వేశ్వరయ్య 1861 సెప్టెంబర్ 15న ప్రస్తుత కర్ణాటక రాష్ట్రంలోని ముద్దెనహళ్లిలో జన్మించారు. భారతదేశ అభివృద్ధిలో ఇంజినీరింగ్, నీటిపారుదల, ప్రజా మౌలిక వసతుల రంగాల్లో ఆయన చేసిన సేవలు చిరస్మరణీయమైనవి. డ్యాములు, వంతెనలు, నీటిపారుదల ప్రాజెక్టులు, నీటి నిర్వహణకు సంబంధించిన అనేక అభివృద్ధి కార్యక్రమాల్లో ఆయన కీలక పాత్ర పోషించారు.

విశ్వేశ్వరయ్య సేవలను స్మరించుకుంటూ ప్రతి సంవత్సరం సెప్టెంబర్ 15న ఇంజినీర్స్ డే నిర్వహిస్తారు. ఆయన జీవితం, కృషి, క్రమశిక్షణ నేటి యువతకు ఆదర్శంగా నిలుస్తాయని కార్యక్రమంలో వక్తలు పేర్కొన్నారు.

“నేటి విద్యార్థులే రేపటి దేశ పౌరులు. వారు క్రమశిక్షణతో విద్యను అభ్యసించి దేశ అభివృద్ధిలో భాగస్వాములు కావాలి” అని వారు సూచించారు.

ఈ కార్యక్రమంలో కరాటే మాస్టర్లు శివ, భారతి, ప్రవళిక, అజయ్ తదితరులు, అకాడమీ విద్యార్థులు పాల్గొన్నారు.

raju rathodAY24-R-0014· 15 Sep 2026 · 10:08