విద్యార్థులను ప్రోత్సహించిన వైద్యుల కృష్ణమూర్తి
తిదేడు, సెప్టెంబర్ 19 (ప్రతినిధి): చింతపల్లి మండలం తిదేడు గ్రామంలోని జిల్లా పరిషత్ ఉన్నత పాఠశాలలో హిందీ భాషా దినోత్సవాన్ని ఘనంగా నిర్వహించారు. పాఠశాల ప్రధానోపాధ్యాయులు జి. సురేందర్ అధ్యక్షతన, హిందీ ఉపాధ్యాయులు లెంకల రామిరెడ్డి ఆధ్వర్యంలో ఈ కార్యక్రమం జరిగింది.
కార్యక్రమానికి వెంకటంపేట గ్రామానికి చెందిన కీర్తిశేషులు డాక్టర్ చలపతిరావు కుమారుడు వైద్యుల కృష్ణమూర్తి ముఖ్య అతిథిగా హాజరయ్యారు. ఈ సందర్భంగా విద్యార్థులను ఉద్దేశించి మాట్లాడుతూ.. హిందీ భాషను నేర్చుకోవడం వల్ల విద్యార్థులకు భవిష్యత్తులో అనేక ప్రయోజనాలు ఉంటాయని, భాషలపై పట్టు సాధించడం విద్యార్థుల అభివృద్ధికి దోహదపడుతుందని తెలిపారు.
2026 పదో తరగతి పరీక్షల్లో ఉత్తమ ప్రతిభ కనబరిచిన విద్యార్థిని జి. సౌమ్యకు ప్రతిభా అవార్డుతో పాటు నగదు బహుమతిని కృష్ణమూర్తి అందజేశారు. విద్యార్థులను ప్రోత్సహించేందుకు కృష్ణమూర్తి చేస్తున్న సేవలను పాఠశాల ప్రధానోపాధ్యాయులు అభినందించారు.
హిందీ ఉపాధ్యాయులు లెంకల రామిరెడ్డి మాట్లాడుతూ.. హిందీ భాష నేర్చుకోవడం వల్ల విద్యార్థులకు ఎంతో మేలు జరుగుతుందని అన్నారు. విద్యార్థులను ప్రోత్సహించే ఉద్దేశంతో తన మిత్రుడు కృష్ణమూర్తి 2027 సంవత్సరానికి కూడా ప్రోత్సాహక బహుమతులు ప్రకటించడం అభినందనీయమని, ఇందుకు ఆయనకు ధన్యవాదాలు తెలిపారు.
హిందీ భాషా దినోత్సవం సందర్భంగా పాఠశాలలో నిర్వహించిన వ్యాసరచన పోటీల్లో విజేతలకు బహుమతులు అందజేశారు.
ఈ కార్యక్రమంలో పాఠశాల ఉపాధ్యాయులు పద్మ, వై. శ్రీరాములు, పి. శ్రీరాములు, జి. దేవకుమార్, ఈ. విష్ణుకాంత్, పి. వాసుదేవరెడ్డి, కె. చందూలాల్ తదితరులతో పాటు విద్యార్థినీ, విద్యార్థులు పాల్గొన్నారు.
Leave a Reply