గోదావరి పుష్కరాల నేపథ్యంలో భారీ ఘాట్ల ఏర్పాటుకు ప్రణాళికలు

తమ్మిచెరువు అభివృద్ధిపై మాజీ ఎమ్మెల్యే పుట్ట మధూకర్ విమర్శలకు కౌంటర్

రావుల చెరువు ఆక్రమణల వివరాలు ఇస్తే చర్యలు తీసుకుంటామని స్పష్టం

మంత్రి శ్రీధర్‌బాబు సహకారంతో పరిశ్రమలు, యువతకు ఉపాధి అవకాశాల కల్పనకు కృషి

మంథని, అక్టోబర్ 20, 2026, AYUSH24 NEWS ప్రతినిధి:

మంథని పట్టణాన్ని అన్ని రంగాల్లో అభివృద్ధి చేసి చూపిస్తామని మున్సిపల్ చైర్మన్ వోడ్నాల శ్రీనివాస్, వైస్ చైర్మన్ ముస్కుల సయేందర్ రెడ్డి తెలిపారు. రాష్ట్ర ఐటీ, పరిశ్రమలు, శాసనసభ వ్యవహారాల శాఖ మంత్రి దుద్దిళ్ల శ్రీధర్‌బాబు సహకారంతో పట్టణంలో అభివృద్ధి కార్యక్రమాలను ముందుకు తీసుకెళ్తున్నామని పేర్కొన్నారు.

మంగళవారం మంథని మున్సిపల్ కార్యాలయంలో చైర్మన్ వోడ్నాల శ్రీనివాస్ ఆధ్వర్యంలో నిర్వహించిన విలేకరుల సమావేశంలో వారు మాట్లాడారు. ఈ సందర్భంగా పట్టణ ప్రజలందరికీ విజయదశమి శుభాకాంక్షలు తెలియజేశారు.

గోదావరి పుష్కరాలతో మంథని రూపురేఖలు మారనున్నాయి

రానున్న గోదావరి పుష్కరాలను దృష్టిలో ఉంచుకుని మంథనిలో భారీ గోదావరి స్నానఘాట్ల ఏర్పాటుకు ప్రణాళికలు రూపొందిస్తున్నట్లు తెలిపారు. పుష్కరాల సందర్భంగా భక్తులకు అవసరమైన సౌకర్యాలు కల్పించడంతో పాటు పట్టణ అభివృద్ధికి ప్రాధాన్యం ఇస్తున్నామని చెప్పారు.

మంత్రి శ్రీధర్‌బాబు మంథని అభివృద్ధే లక్ష్యంగా పనిచేస్తున్నారని, ఆయన సహకారంతో రానున్న రోజుల్లో పట్టణ రూపురేఖలు మారనున్నాయని పేర్కొన్నారు.

తమ్మిచెరువుపై పుట్ట మధూకర్ విమర్శలకు ప్రతిస్పందన

తమ్మిచెరువు అభివృద్ధి పనులు నిలిచిపోయాయని మాజీ ఎమ్మెల్యే పుట్ట మధూకర్ చేసిన విమర్శలను మున్సిపల్ చైర్మన్, వైస్ చైర్మన్ ఖండించారు.

తమ్మిచెరువు కట్ట వద్ద చీకటి ఉందంటూ పగటిపూట విమర్శలు చేయడం విడ్డూరంగా ఉందని వ్యాఖ్యానించారు. రాత్రివేళ అక్కడికి వెళ్లి పరిస్థితులను పరిశీలించాలని సూచించారు.

మున్సిపల్ కమిషనర్, కౌన్సిలర్లతో కలిసి పట్టణంలోని సమస్యలను గుర్తించి పరిష్కరించేందుకు కృషి చేస్తున్నామని తెలిపారు. ప్రజల నుంచి వచ్చే సమస్యలను ఎప్పటికప్పుడు మంత్రి శ్రీధర్‌బాబు దృష్టికి తీసుకెళ్లి పరిష్కారానికి చర్యలు చేపడుతున్నామని వివరించారు.

పదేళ్ల పాలనలో ఎందుకు పూర్తి చేయలేదని ప్రశ్న

తమ్మిచెరువు సుందరీకరణ పనులు 70 శాతం పూర్తయ్యాయని మాజీ ఎమ్మెల్యే చెబుతున్నారని, అయితే గత పదేళ్ల పాలనలో మిగిలిన పనులను ఎందుకు పూర్తి చేయలేదని ప్రశ్నించారు.

గత పాలనలో కాంట్రాక్టర్లను బెదిరించి కమీషన్లు వసూలు చేశారని, నాణ్యతలేని పనులు చేపట్టారని వారు ఆరోపించారు. అభివృద్ధిపై విమర్శలు చేసే ముందు గత పాలనలో చేపట్టిన పనుల వివరాలను ప్రజల ముందుంచాలని డిమాండ్ చేశారు.

రావుల చెరువు ఆక్రమణల వివరాలు ఇవ్వండి

రావుల చెరువు విస్తీర్ణం తగ్గిపోయిందని, ఆక్రమణలు జరిగాయని మాజీ ఎమ్మెల్యే చేసిన ఆరోపణలపైనా స్పందించారు.

చెరువు ఆక్రమణలకు సంబంధించిన వివరాలు, ఆధారాలు ఉంటే తమకు అందజేయాలని కోరారు. అవసరమైతే కలిసి పరిశీలించేందుకు సిద్ధంగా ఉన్నామని తెలిపారు.

రావుల చెరువుకు సంబంధించిన ఒక్క అంగుళం భూమి కూడా ఆక్రమణకు గురైనా ఉపేక్షించబోమని, ఆక్రమణలు నిర్ధారణ అయితే చట్టపరమైన చర్యలు తీసుకుంటామని స్పష్టం చేశారు.

యువతకు ఉపాధి కల్పించేందుకు పరిశ్రమల ఏర్పాటు

మంథని ప్రాంత యువతకు ఉపాధి అవకాశాలు కల్పించేందుకు మంత్రి శ్రీధర్‌బాబు ప్రత్యేకంగా కృషి చేస్తున్నారని తెలిపారు.

చిన్న పరిశ్రమల ఏర్పాటుతో స్థానికులకు ఉపాధి కల్పించడంతో పాటు మహిళలు ఆర్థికంగా ఎదిగేలా చర్యలు తీసుకుంటున్నామని చెప్పారు.

మంథని ప్రాంతంలో టాస్క్ శిక్షణ కేంద్రం ఏర్పాటు చేయడం యువతకు ఉపయోగకరంగా ఉంటుందని పేర్కొన్నారు. నైపుణ్యాభివృద్ధి శిక్షణ ద్వారా యువతకు ఉద్యోగ అవకాశాలు మెరుగుపడతాయని అభిప్రాయపడ్డారు.

గత పాలనలో ఉపాధి అవకాశాలు దెబ్బతిన్నాయని ఆరోపిస్తూ, ప్రస్తుత ప్రభుత్వం ప్రతి ఒక్కరికీ ఉపాధి కల్పించాలనే లక్ష్యంతో పనిచేస్తోందని తెలిపారు.

మంథని అభివృద్ధే మా లక్ష్యం

తాము ఇదే ప్రాంతంలో పుట్టి పెరిగామని, మంథని ప్రజల అవసరాలు, సమస్యలపై తమకు అవగాహన ఉందని మున్సిపల్ చైర్మన్ వోడ్నాల శ్రీనివాస్, వైస్ చైర్మన్ ముస్కుల సయేందర్ రెడ్డి పేర్కొన్నారు.

ప్రజల సహకారం, మంత్రి శ్రీధర్‌బాబు మార్గదర్శకత్వంతో మంథని పట్టణాన్ని అభివృద్ధి పథంలో ముందుకు తీసుకెళ్తామని తెలిపారు.

ఈ కార్యక్రమంలో మున్సిపల్ కౌన్సిలర్లు ఎల్లంకి వంశీ, మారుపక నిహారిక, పెంటరి రాజు, కుర్ర లింగయ్య, జంబోజు శ్రీమతి సమ్మయ్య, ఎరుకల స్రవంతి రమేష్ బాబు, కాంగ్రెస్ పార్టీ రాష్ట్ర సోషల్ మీడియా కార్యదర్శి అరెల్లి కిరణ్ గౌడ్ తదితరులు పాల్గొన్నారు.