దేవరకొండ: సమాచార హక్కు చట్టం–2005 నిబంధనలను పాటించకుండా, నిర్ణీత గడువులోగా సమగ్ర సమాచారం అందించడంలో నిర్లక్ష్యం వహించినందుకు దేవరకొండ మండల విద్యాధికారి (MEO) మాతృ నాయక్‌కు తెలంగాణ రాష్ట్ర సమాచార కమిషన్ ₹2,000 జరిమానా విధించింది.
శ్రీ చైతన్య పాఠశాలకు సంబంధించిన పలు అంశాలపై RTI ద్వారా సమాచారం కోరిన రైట్ టు ఇన్ఫర్మేషన్ సర్వీస్ సొసైటీ (RTISS) వ్యవస్థాపక జాతీయ అధ్యక్షుడు కె. బాబురామ్ నాయక్ రాష్ట్ర సమాచార కమిషన్‌ను ఆశ్రయించారు. ఈ మేరకు కేసు నెం. 1139/SIC-DB/2026పై గురువారం విచారణ జరిగింది.
20 కీలక అంశాలపై సమాచారం కోరిన బాబురామ్ నాయక్
దేవరకొండ ముదిగొండ రోడ్డులోని శ్రీ చైతన్య పాఠశాలకు సంబంధించిన గుర్తింపు, అనుమతులు, 9, 10 తరగతుల నిర్వహణ, గతంలో సీజ్ చేసిన ప్రవేశ కేంద్రాన్ని డీ-సీలింగ్ చేసిన వివరాలు, భవన భద్రత, ఫైర్ NOC, పరిసర ప్రాంతంలోని బార్ & రెస్టారెంట్‌పై తనిఖీ నివేదికలు, నలంద ఎడ్యుకేషనల్ సొసైటీ పేరుతో ఉన్న గుర్తింపు మరియు శ్రీ చైతన్య పేరుతో నిర్వహణకు సంబంధించిన ఒప్పందాలు తదితర 20 అంశాలపై బాబురామ్ నాయక్ RTI చట్టంలోని సెక్షన్ 6(1) కింద సమాచారం కోరినట్లు తెలిపారు.
అయితే కోరిన సమాచారంపై అరకొర సమాధానాలు మాత్రమే అందాయని, మొదటి అప్పీల్‌పైనా తగిన స్పందన రాలేదని పేర్కొంటూ ఆయన రాష్ట్ర సమాచార కమిషన్‌లో రెండో అప్పీల్ దాఖలు చేశారు.
అధికారులపై కమిషనర్ తీవ్ర ఆగ్రహం
విచారణ సందర్భంగా ఫిర్యాదుదారు కె. బాబురామ్ నాయక్ ఆధారాలతో కూడిన అఫిడవిట్‌ను కమిషన్‌కు సమర్పించారు. విచారణకు హాజరైన DEO, RJD, MEOల నుంచి వివరాలు తీసుకున్న రాష్ట్ర సమాచార కమిషనర్ దేశాల భూపాల్, సమాచార హక్కు చట్టం అమలులో జాప్యంపై అధికారులను హెచ్చరించినట్లు పేర్కొన్నారు.
సమాచారాన్ని సకాలంలో అందించడంలో నిర్లక్ష్యం వహించినందుకు దేవరకొండ MEO మాతృ నాయక్‌కు ₹2,000 జరిమానా విధిస్తూ కమిషన్ ఆదేశాలు జారీ చేసింది.
అదేవిధంగా, దరఖాస్తుదారు కోరిన 20 అంశాలకు సంబంధించిన పూర్తి సమాచారాన్ని 15 రోజుల్లోగా ఉచితంగా అందించాలని కమిషన్ ఆదేశించింది. ఆదేశాలను నిర్దేశిత గడువులో అమలు చేయకపోతే బాధ్యులైన అధికారులపై తదుపరి చట్టపరమైన చర్యలు తీసుకునే అవకాశం ఉందని స్పష్టం చేసినట్లు సమాచారం.
— Ayush 24 News
The Voice of Truth

Mahamood MohammedAY24-R-0008· 17 Sep 2026 · 11:30