చింతపల్లి, అక్టోబర్ 16 (ఆయుష్ 24 న్యూస్): చింతపల్లి పట్టణంలోని శ్రీ సాయిబాబా దేవాలయంలో శరన్నవరాత్రి వేడుకలు భక్తిశ్రద్ధలతో కొనసాగుతున్నాయి. ఉత్సవాల్లో భాగంగా శుక్రవారం శ్రీ మహాసరస్వతీ దేవి అవతారాన్ని పురస్కరించుకుని ఆలయంలో ప్రత్యేక పూజా కార్యక్రమాలను నిర్వహించారు.
ఉదయం 9 గంటలకు శ్రీ మహాసరస్వతీ దేవికి పంచామృతాలతో అభిషేకం నిర్వహించారు. అనంతరం ఉదయం 10 గంటలకు కుంకుమార్చన, లలితా సహస్రనామ పారాయణం భక్తిపూర్వకంగా జరిపారు. మధ్యాహ్నం శ్రీ సాయిబాబాకు హారతి సమర్పించిన తర్వాత 108 కలశాలతో, వివిధ రకాల పండ్లతో ప్రత్యేక అభిషేక కార్యక్రమాన్ని నిర్వహించారు.
అనంతరం కుమారి వనపర్తి వెంకట నాగసింధు సీతారామ కల్యాణం హరికథా గానాన్ని ఆలపించి భక్తులను ఆధ్యాత్మిక భావనలో ముంచెత్తారు. ఈ కార్యక్రమంలో భక్తులు పాల్గొని స్వామివారి, అమ్మవారి ఆశీస్సులు పొందారు.
ఈ సందర్భంగా ఆలయ అధ్యక్షుడు మంచికంటి ధనంజయ మాట్లాడుతూ, అమ్మవారి కటాక్షం ప్రజలందరిపై ఉండాలని ఆకాంక్షించారు. భక్తులు అధిక సంఖ్యలో దేవాలయాన్ని సందర్శించి అమ్మవారి ఆశీస్సులు పొందాలని కోరారు.
ఈ కార్యక్రమంలో ఆలయ కమిటీ సభ్యులు, భక్తులు, స్థానికులు తదితరులు పాల్గొన్నారు.
— ఆయుష్ 24 న్యూస్

Mahamood MohammedAY24-R-0008· 16 Oct 2026 · 16:43