ఆయుష్ 24 న్యూస్ | అక్టోబర్ 12, 2026
ప్రజాస్వామ్య వ్యవస్థలో ప్రభుత్వ సమాచారం ప్రజల హక్కు అని, ప్రజల పన్నులతో నడిచే ప్రభుత్వాల ఖర్చులు, పనుల వివరాలను తెలుసుకునే అధికారం ప్రతి పౌరుడికీ ఉందని రైట్ టు ఇన్ఫర్మేషన్ సర్వీస్ సొసైటీ వ్యవస్థాపకులు, జాతీయ అధ్యక్షులు కేతావత్ బాబురామ్ నాయక్ (ఎంటెక్) అన్నారు.
సమాచార హక్కు చట్టం–2005 అమలులోకి వచ్చి 21 సంవత్సరాలు పూర్తయి, 22వ సంవత్సరంలోకి అడుగుపెడుతున్న సందర్భంగా ఆయన దేశ ప్రజలకు సమాచార హక్కు దినోత్సవ శుభాకాంక్షలు తెలిపారు. ఈ సందర్భంగా చట్టం అమలు, ప్రజలకు ఎదురవుతున్న సమస్యలు, ప్రభుత్వాలు చేపట్టాల్సిన చర్యలపై పలు కీలక అంశాలను వెల్లడించారు.
సామాన్యుడి చేతిలో బ్రహ్మాస్త్రం
భారత రాజ్యాంగంలోని అధికరణ 19(1)(ఎ) కల్పించిన భావప్రకటన స్వేచ్ఛ, అధికరణ 21 కల్పించిన జీవించే హక్కుల నేపథ్యంలో సమాచార హక్కు ప్రాధాన్యతను గుర్తించాలని బాబురామ్ నాయక్ పేర్కొన్నారు. పాలనలో పారదర్శకత, జవాబుదారీతనం పెంపొందించేందుకు ఈ చట్టం కీలకంగా నిలుస్తోందన్నారు.
గ్రామపంచాయతీలు, పురపాలక సంఘాలు, రెవెన్యూ, విద్య, వైద్య, సంక్షేమ శాఖల్లో చేపట్టే పనుల అనుమతులు, అంచనాలు, ఒప్పందాలు, కొలతల పుస్తకాలు, బిల్లుల చెల్లింపుల వివరాలను పౌరులు చట్ట ప్రకారం కోరవచ్చని తెలిపారు. తెలంగాణలో భూ రికార్డులు, ధరణి, పహాణీలు, విద్యార్థుల ఉపకార వేతనాలు, సంక్షేమ పథకాల అమలులో పారదర్శకత కోసం సమాచార హక్కును వినియోగించుకోవచ్చని వివరించారు.

Mahamood MohammedAY24-R-0008· 12 Oct 2026 · 07:14