మంథని, సెప్టెంబర్ 8: తెలంగాణ అసెంబ్లీ స్పీకర్ గడ్డం ప్రసాద్ కుమార్‌పై బీఆర్ఎస్ ఎమ్మెల్సీ తాతా మధు చేసినట్లు పేర్కొంటున్న అనుచిత వ్యాఖ్యలను ఖండిస్తూ మంథని కాంగ్రెస్ పార్టీ నాయకులు నిరసన కార్యక్రమం నిర్వహించారు.
కాంగ్రెస్ పార్టీ ఎస్సీ సెల్ ఆధ్వర్యంలో మంథని పట్టణంలోని అంబేద్కర్ చౌరస్తాలో ప్రధాన రహదారిపై బైఠాయించి, డప్పులతో నిరసన తెలిపారు. స్పీకర్‌పై చేసిన వ్యాఖ్యలకు ఎమ్మెల్సీ తాతా మధు వెంటనే క్షమాపణలు చెప్పాలని, ఆయనపై తగిన చర్యలు తీసుకోవాలని కాంగ్రెస్ నాయకులు డిమాండ్ చేశారు.
ఈ సందర్భంగా మండల కాంగ్రెస్ పార్టీ అధ్యక్షుడు అయిలి ప్రసాద్, వ్యవసాయ మార్కెట్ కమిటీ చైర్మన్ కుదుదుల వెంకన్న, ఎస్సీ సెల్ డివిజన్ అధ్యక్షుడు మంథని సత్యం, ఎస్సీ సెల్ మండల అధ్యక్షుడు మంథని రాకేష్, జిల్లా ప్రధాన కార్యదర్శి జనగామ నర్సింగరావు, గ్రామ శాఖ అధ్యక్షుడు చంద్రు రాజమల్లు తదితరులు మాట్లాడారు.
అసెంబ్లీ సమావేశాల సందర్భంగా స్పీకర్‌పై వ్యక్తిగతంగా, అనుచితంగా వ్యాఖ్యలు చేయడం శాసనసభ గౌరవానికి భంగం కలిగించే విధంగా ఉందని వారు పేర్కొన్నారు. రాజకీయంగా విమర్శలు చేసుకోవడం ప్రజాస్వామ్యంలో సహజమే అయినప్పటికీ, స్పీకర్ పదవి, వ్యక్తిగత గౌరవం దెబ్బతినేలా వ్యాఖ్యలు చేయడం సమర్థనీయం కాదని అన్నారు.
స్పీకర్ గడ్డం ప్రసాద్ కుమార్ సభలో భావోద్వేగానికి గురైన ఘటన బాధాకరమని కాంగ్రెస్ నాయకులు పేర్కొన్నారు. ఇలాంటి ఘటనలు పునరావృతం కాకుండా సంబంధిత వ్యక్తులు బాధ్యత వహించి క్షమాపణలు చెప్పాలని డిమాండ్ చేశారు.
బీఆర్ఎస్ నాయకులు చేస్తున్న రాజకీయ విమర్శలు, ఆందోళనలపై కూడా కాంగ్రెస్ నాయకులు స్పందిస్తూ, ప్రభుత్వం చేపడుతున్న సంక్షేమ, అభివృద్ధి కార్యక్రమాలను ప్రజలు గమనిస్తున్నారని అన్నారు. రాబోయే ఎన్నికల్లో ప్రజలు తగిన సమాధానం చెబుతారని వ్యాఖ్యానించారు.
ఈ కార్యక్రమంలో ప్రజాప్రతినిధులు, మున్సిపల్ కౌన్సిలర్లు, సీనియర్ నాయకులు, గ్రామ సర్పంచులు, ఉప సర్పంచులు, యూత్ కాంగ్రెస్, మహిళా కాంగ్రెస్ నాయకులు, అనుబంధ సంఘాల ప్రతినిధులు, కాంగ్రెస్ పార్టీ నాయకులు, కార్యకర్తలు, అభిమానులు తదితరులు పాల్గొన్నారు.
– అయుష్ 24 న్యూస్ ప్రతినిధి, మంథని
Leave a Reply