న్యాయమైన డిమాండ్లు పరిష్కరించాలని డిమాండ్

సెప్టెంబర్ 28 నుంచి మూడు రోజుల సమ్మె.. అక్టోబర్ 26 నుంచి నిరవధిక సమ్మెకు హెచ్చరిక

నల్లగొండ, సెప్టెంబర్ 11 — అయుష్ 24 న్యూస్:

యునైటెడ్ ఫోరం ఆఫ్ బ్యాంక్ యూనియన్స్ (UFBU) పిలుపు మేరకు బ్యాంకు ఉద్యోగుల న్యాయమైన డిమాండ్ల సాధన కోసం నల్లగొండ పట్టణంలో భారీ ర్యాలీ, నిరసన ప్రదర్శన నిర్వహించారు.

జిల్లాలోని వివిధ బ్యాంకులకు చెందిన సుమారు 600 మంది ఉద్యోగులు క్లాక్ టవర్ వద్ద ఉన్న ఎస్‌బీఐ నుంచి ర్యాలీగా బయలుదేరారు. పట్టణంలోని ప్రధాన వీధుల గుండా నినాదాలు చేస్తూ ఎస్‌బీఐ రీజినల్ బిజినెస్ ఆఫీస్ (RBO) వద్దకు చేరుకుని నిరసన ప్రదర్శన చేపట్టారు.

ఐదు రోజుల బ్యాంకింగ్ విధానం అమలు చేయాలి

ఈ సందర్భంగా బ్యాంకు ఉద్యోగ సంఘాల నాయకులు మాట్లాడుతూ ఐదు రోజుల బ్యాంకింగ్ విధానాన్ని తక్షణమే అమలు చేయాలని డిమాండ్ చేశారు. పీఎల్‌ఐ (PLI) చెల్లింపుల్లో ఉన్న వివక్షను తొలగించి సమాన విధానాన్ని అమలు చేయాలని కోరారు.

12వ ద్వైపాక్షిక వేతన ఒప్పందంలో ఇంకా పరిష్కారం కాని అంశాలను, ఇచ్చిన హామీలను వెంటనే అమలు చేయాలని డిమాండ్ చేశారు. అలాగే బ్యాంకు పెన్షనర్లకు పెన్షన్ అప్‌డేషన్ చేపట్టాలని కోరారు.

బ్యాంకు ఉద్యోగులు దీర్ఘకాలంగా తమ డిమాండ్లను ప్రభుత్వం దృష్టికి తీసుకెళ్తున్నప్పటికీ ఆశించిన స్థాయిలో పురోగతి కనిపించడం లేదని నాయకులు పేర్కొన్నారు. పలుమార్లు విజ్ఞప్తులు, చర్చలు జరిగినా సమస్యలు పరిష్కారం కాకపోవడంతోనే దేశవ్యాప్తంగా ఉద్యమాలు చేపట్టాల్సి వస్తోందని తెలిపారు.

ఉద్యమాన్ని ఉధృతం చేస్తామని హెచ్చరిక

కేంద్ర ప్రభుత్వం తక్షణమే స్పందించి బ్యాంకు ఉద్యోగుల సమస్యల పరిష్కారానికి చర్యలు చేపట్టాలని నాయకులు డిమాండ్ చేశారు.

సమస్యలు పరిష్కారం కాకపోతే UFBU పిలుపు మేరకు ఉద్యమాన్ని మరింత ఉధృతం చేస్తామని హెచ్చరించారు. సెప్టెంబర్ 28, 29, 30 తేదీల్లో మూడు రోజుల సమ్మె చేపడతామని, అప్పటికీ డిమాండ్లు పరిష్కారం కాకపోతే 2026 అక్టోబర్ 26 నుంచి నిరవధిక సమ్మెకు దిగుతామని స్పష్టం చేశారు.

ఈ కార్యక్రమంలో AIBOC నాయకులు టి. శ్రామిక్, ఎస్.కె. రియాజ్ పాషా, NCBE నాయకులు టి. సుమన్ కుమార్, SBISUHC నల్లగొండ (AO) OBC ఆర్గనైజింగ్ సెక్రటరీ, SBI OBC ఎంప్లాయిస్ వెల్ఫేర్ అసోసియేషన్ హైదరాబాద్ సర్కిల్ రాష్ట్ర అధ్యక్షుడు NVT, ఎం. ప్రవీణ్ కుమార్, ఎస్. జీవన్ కుమార్, ఎస్. నరసింహ, AIBEA నాయకులు కె. ఈశ్వర్, రాజశేఖర్, రాజుతో పాటు ఇతర UFBU నాయకులు పాల్గొని ప్రసంగించారు.

బ్యాంకు ఉద్యోగుల డిమాండ్ల పరిష్కారంలో కేంద్ర ప్రభుత్వం జాప్యం చేస్తోందని ఆరోపిస్తూ నాయకులు నిరసన వ్యక్తం చేశారు.

— అయుష్ 24 న్యూస్