సింగరేణి సీఎస్‌ఆర్ నిధులతో నాగేపల్లి–వెంకటాపూర్ రహదారి అభివృద్ధి

మంత్రి శ్రీధర్‌బాబు చిత్రపటానికి పాలాభిషేకం చేసిన కాంగ్రెస్ నాయకులు

మంథని, సెప్టెంబర్ 6 — అయుష్ 24 న్యూస్:
సింగరేణి సీఎస్‌ఆర్ నిధుల ద్వారా మంథని మండలంలోని నాగేపల్లి నుంచి వెంకటాపూర్ గ్రామం వరకు డబుల్ రోడ్డు నిర్మాణానికి రూ.11.72 కోట్ల నిధులు మంజూరు కావడంతో కాంగ్రెస్ పార్టీ నాయకులు, స్థానిక ప్రజలు హర్షం వ్యక్తం చేశారు. ఈ సందర్భంగా రాష్ట్ర ఐటీ, ఈసీ, పరిశ్రమలు, శాసనసభ వ్యవహారాల శాఖ మంత్రి దుద్దిళ్ల శ్రీధర్‌బాబు చిత్రపటానికి కాంగ్రెస్ నాయకులు పాలాభిషేకం నిర్వహించారు.

ఈ సందర్భంగా మంత్రి శ్రీధర్‌బాబు, టీపీసీసీ ప్రధాన కార్యదర్శి దుద్దిళ్ల శ్రీనుబాబుకు కాంగ్రెస్ నాయకులు ప్రత్యేక కృతజ్ఞతలు తెలిపారు. రహదారి అభివృద్ధికి నిధులు మంజూరు చేయడం పట్ల స్థానిక ప్రజలు సంతోషం వ్యక్తం చేశారు.

అభివృద్ధికి ప్రాధాన్యత: కాంగ్రెస్ నాయకులు

కార్యక్రమంలో మంథని మండల కాంగ్రెస్ అధ్యక్షుడు అయిలి ప్రసాద్, వ్యవసాయ మార్కెట్ కమిటీ చైర్మన్ కుదుదుల వెంకన్న, ఎస్సీ సెల్ డివిజన్ అధ్యక్షుడు మంథని సత్యం, మాజీ ఎంపీటీసీ నూకల బానయ్య, మాజీ మండల యూత్ కాంగ్రెస్ అధ్యక్షుడు ఎరుకల ప్రవీణ్, నాగేపల్లి సర్పంచ్ గుమ్మడి సమ్మయ్య, కొండ మహేందర్ తదితరులు మాట్లాడారు.

సింగరేణి ద్వారా లభించే సీఎస్‌ఆర్ నిధులను గత ప్రభుత్వం సక్రమంగా వినియోగించలేదని, దీంతో నియోజకవర్గంలోని పలు గ్రామాల్లో అభివృద్ధి పనులు ఆశించిన స్థాయిలో జరగలేదని వారు ఆరోపించారు.

ప్రస్తుత ప్రభుత్వ హయాంలో మంథని నియోజకవర్గ అభివృద్ధికి ప్రాధాన్యత ఇస్తున్నామని, సింగరేణి సీఎస్‌ఆర్ నిధుల ద్వారా రూ.11.72 కోట్లతో నాగేపల్లి–వెంకటాపూర్ డబుల్ రోడ్డు మంజూరు కావడం ఇందుకు ఉదాహరణ అని నాయకులు పేర్కొన్నారు.

పేద ప్రజలకు అవసరమైన మౌలిక వసతులను గుర్తించి వాటిని అందించేందుకు ప్రభుత్వం చర్యలు తీసుకుంటోందని తెలిపారు. మంథని నియోజకవర్గంతో పాటు రాష్ట్ర అభివృద్ధి కోసం మంత్రి శ్రీధర్‌బాబు, దుద్దిళ్ల శ్రీనుబాబు నిరంతరం కృషి చేస్తున్నారని పేర్కొన్నారు.

అభివృద్ధి పనుల విషయంలో తాము చేపట్టిన కార్యక్రమాలను ఇతరులు తమ ఖాతాలో వేసుకోవడం సరికాదని కాంగ్రెస్ నాయకులు విమర్శించారు. అభివృద్ధి పనులకు సంబంధించిన వాస్తవాలను ప్రజలు గమనిస్తున్నారని అన్నారు.

స్థానికుల్లో హర్షం

నాగేపల్లి నుంచి వెంకటాపూర్ వరకు డబుల్ రోడ్డు నిర్మాణానికి నిధులు మంజూరు కావడంతో ప్రయాణ సౌకర్యాలు మెరుగుపడటంతో పాటు గ్రామాల మధ్య రాకపోకలు సులభతరం అవుతాయని స్థానికులు ఆశాభావం వ్యక్తం చేశారు.

ఈ కార్యక్రమంలో ప్రజాప్రతినిధులు, చైర్మన్లు, వైస్ చైర్మన్లు, మాజీ ప్రజాప్రతినిధులు, ఎస్సీ సెల్, బీసీ సెల్ నాయకులు, మండల కాంగ్రెస్ నాయకులు, యూత్ కాంగ్రెస్ నాయకులు, కాంగ్రెస్ పార్టీ కార్యకర్తలు, అభిమానులు, స్థానిక ప్రజలు తదితరులు పాల్గొన్నారు.

— అయుష్ 24 న్యూస్