హైదరాబాద్‌లో యూనివర్సిటీ ఆఫ్ లండన్ క్యాంపస్ ఏర్పాటుపై కీలక చర్చ

లండన్, ఆగస్టు 23, అయుష్ 24 న్యూస్: తెలంగాణ ముఖ్యమంత్రి శ్రీ ఎ. రేవంత్ రెడ్డి, రాష్ట్ర పరిశ్రమలు–ఐటీ శాఖ మంత్రి దుద్దిళ్ల శ్రీధర్ బాబుతో కలిసి లండన్‌లోని చారిత్రక అంబేద్కర్ హౌస్‌ను సందర్శించారు. బాబాసాహెబ్ డాక్టర్ బీఆర్ అంబేద్కర్ 1921–22 కాలంలో లండన్‌లో నివసించిన ఈ భవనం ప్రస్తుతం ఆయన జీవితాన్ని, ఆలోచనలను ప్రతిబింబించే మ్యూజియంగా ఉంది.

ఈ సందర్భంగా అంబేద్కర్ హౌస్‌ను సందర్శించడం తనకు ఎంతో స్ఫూర్తినిచ్చిందని సీఎం రేవంత్ రెడ్డి పేర్కొన్నారు. సామాజిక న్యాయం కోసం మరింత అంకితభావంతో పనిచేయాలనే సంకల్పం ఈ సందర్శనతో బలపడిందని ఆయన సందర్శకుల డైరీలో రాసినట్లు అధికారులు తెలిపారు.

అంబేద్కర్ మ్యూజియంలో ఆయన జీవితానికి సంబంధించిన పలు అంశాలను సీఎం రేవంత్ రెడ్డి, మంత్రి శ్రీధర్ బాబుకు వివరించారు. అంబేద్కర్ ఆశయాలు, రాజ్యాంగబద్ధత, సమానత్వం, సామాజిక న్యాయం వంటి విలువలను మ్యూజియం ప్రతిబింబిస్తోంది.

హైదరాబాద్‌లో యూనివర్సిటీ ఆఫ్ లండన్ క్యాంపస్

ఇదిలా ఉండగా, తెలంగాణ రైజింగ్ ప్రతినిధి బృందానికి సీఎం రేవంత్ రెడ్డి నాయకత్వం వహిస్తూ లండన్‌లోని సెనేట్ హౌస్, యూనివర్సిటీ ఆఫ్ లండన్లో రౌండ్‌టేబుల్ సమావేశం నిర్వహించారు.

ఈ సమావేశంలో మంత్రి దుద్దిళ్ల శ్రీధర్ బాబు, ప్రభుత్వ అధికారులు కె. రామకృష్ణారావు, జయేశ్ రంజన్ తదితరులు పాల్గొన్నారు. యూనివర్సిటీ ఆఫ్ లండన్ ప్రతినిధులతో హైదరాబాద్‌లో ఉన్నత విద్య, పరిశోధన, అంతర్జాతీయ విద్యా అవకాశాలపై చర్చించారు.

హైదరాబాద్‌లో యూనివర్సిటీ ఆఫ్ లండన్ క్యాంపస్ ఏర్పాటు చేసే దిశగా ఆ సంస్థ కృషి చేస్తోందని ప్రతినిధులు వెల్లడించారు. యూనివర్సిటీకి చెందిన వివిధ స్కూళ్లు, విభాగాల ద్వారా విస్తృత స్థాయిలో విద్యా కోర్సులు, కార్యక్రమాలను తెలంగాణలో అందించే అవకాశాలను పరిశీలిస్తున్నట్లు తెలిపారు.

ఈ భేటీలో లండన్ స్కూల్ ఆఫ్ ఎకనామిక్స్ అండ్ పొలిటికల్ సైన్స్ (LSE), స్కూల్ ఆఫ్ ఓరియంటల్ అండ్ ఆఫ్రికన్ స్టడీస్ (SOAS) ప్రతినిధులు కూడా పాల్గొన్నారు.

హైదరాబాద్‌ను ప్రపంచ స్థాయి విద్యా కేంద్రంగా అభివృద్ధి చేయాలనే తెలంగాణ ప్రభుత్వ లక్ష్యంలో భాగంగా ప్రముఖ అంతర్జాతీయ విద్యాసంస్థలను రాష్ట్రానికి ఆహ్వానిస్తున్నామని ప్రతినిధి బృందం వివరించింది.

యూనివర్సిటీ ఆఫ్ లండన్ ప్రస్తుతం 17 ప్రముఖ ఉన్నత విద్యాసంస్థలతో కూడిన ఫెడరేషన్‌గా పనిచేస్తోంది.

అయుష్ 24 న్యూస్
నిజం మా ధ్యేయం… ప్రజలే మా బలం…