చిన్న వయసులోనే తైక్వాండోలో సంచలన విజయాలు సాధిస్తూ గుగులోత్ రుద్విక్ నాయక్ తెలంగాణకు కీర్తి తెస్తున్నాడు. హైదరాబాద్‌లో జరిగిన 1వ వరల్డ్ ఓపెన్ తైక్వాండో ఛాంపియన్‌షిప్–2026లో స్వర్ణ పతకం సాధించి తన ప్రతిభను చాటుకున్నాడు.
రుద్విక్ నాయక్ 24 జనవరి 2024న తైక్వాండో సాధన ప్రారంభించాడు. ప్రస్తుతం అల్కాపూర్‌లోని సైకామ్ ఇంటర్నేషనల్ తైక్వాండో అకాడమీలో మాస్టర్ సైకామ్ సుబ్బారావు (6వ డాన్) శిక్షణలో మెళకువలు నేర్చుకుంటున్నాడు. నర్సింగిలోని వెస్ట్ సైడ్ గ్రామర్ స్కూల్‌లో విద్యాభ్యాసం చేస్తున్న రుద్విక్, చదువుతో పాటు క్రీడల్లోనూ రాణిస్తున్నాడు.
ఇప్పటివరకు రుద్విక్ నాయక్ పలు ప్రతిష్ఠాత్మక పోటీల్లో పాల్గొని అనేక పతకాలు సాధించాడు. 2024లో జరిగిన ఇంటర్ స్కూల్ గ్రేటర్ హైదరాబాద్ ఓపెన్ తైక్వాండో ఛాంపియన్‌షిప్‌లో రజత పతకం, 7వ తెలంగాణ రాష్ట్ర తైక్వాండో ఛాంపియన్‌షిప్‌లో స్వర్ణ పతకం సాధించాడు. 2025లో జరిగిన 8వ తెలంగాణ రాష్ట్ర తైక్వాండో ఛాంపియన్‌షిప్, బెల్లాటర్ తెలంగాణ రాష్ట్ర తైక్వాండో ఛాంపియన్‌షిప్, జీవ రంగారెడ్డి జిల్లా తైక్వాండో ఛాంపియన్‌షిప్‌లలో స్వర్ణ పతకాలు సాధించాడు. అదే ఏడాది జరిగిన ఇండో–నేపాల్ అంతర్జాతీయ తైక్వాండో ఛాంపియన్‌షిప్‌లో కాంస్య పతకం పొందాడు.
2026లో జరిగిన 1వ చిట్ఫ్ రంగారెడ్డి జిల్లా తైక్వాండో ఛాంపియన్‌షిప్‌లోనూ స్వర్ణ పతకం సాధించిన రుద్విక్, తాజాగా 1వ వరల్డ్ ఓపెన్ తైక్వాండో ఛాంపియన్‌షిప్‌లోనూ స్వర్ణ పతకం సాధించి తన విజయ పరంపరను కొనసాగించాడు.
రుద్విక్ నాయక్ తండ్రి గుగులోత్ సురేష్ రిజర్వ్ సబ్ ఇన్‌స్పెక్టర్ ఆఫ్ పోలీస్‌గా పనిచేస్తుండగా, తల్లి గుగులోత్ జ్యోతి అతనికి నిరంతరం ప్రోత్సాహం అందిస్తున్నారు. గురువు మాస్టర్ సైకామ్ సుబ్బారావు శిక్షణ, తల్లిదండ్రుల ప్రోత్సాహంతో రుద్విక్ మరింత ఉన్నత స్థాయికి ఎదుగుతున్నాడు.
ఈ సందర్భంగా 1వ వరల్డ్ ఓపెన్ తైక్వాండో ఛాంపియన్‌షిప్ సౌత్ ఇండియా, తెలంగాణ టెక్నికల్ డైరెక్టర్ మరియు ఆర్గనైజింగ్ మేనేజర్ శ్రీ రాజు రాథోడ్ రుద్విక్ నాయక్‌ను అభినందించారు. చిన్న వయసులోనే అతను ప్రదర్శిస్తున్న ప్రతిభ, క్రమశిక్షణ, పట్టుదల ప్రశంసనీయమని పేర్కొన్నారు. భవిష్యత్తులో జాతీయ, అంతర్జాతీయ పోటీల్లో మరిన్ని పతకాలు సాధించి తెలంగాణతో పాటు భారతదేశానికి కీర్తి తీసుకురావాలని ఆకాంక్షించారు.
Leave a Reply